Foreldrar bálreiðir á hitafundi í Fossvogsskóla

Foreldrar barna í Fossvogsskóla eru afar óánægðir með vinnubrögð Reykjavíkurborgar vegna myglunnar sem kom upp í skólanum fyrr á þessu ári. Mikillar reiði gætti í foreldrahópnum á fundi í Fossvogsskóla í kvöld, einkum vegna ákvörðunar um að farga ekki bókum og húsgögnum úr skólanum heldur taka aftur í notkun.

Fossvogsskóla var lokað um miðjan mars vegna myglu eftir að móðir nemanda í 1. bekk kallaði eftir úttekt. Barn hennar hafði þá glímt við veikindi eftir að hafa byrjað í skólanum. Rannsókn leiddi í ljós raka- og loftgæðavandamál og ráðist var í framkvæmdir í kjölfarið. Í síðustu viku var aðstandendum nemenda greint frá því að framkvæmdum verði ekki lokið í tæka tíð áður en skólastarf hefst í næstu viku.

Sá hluti skólans sem kallaður er Vesturland er þannig ekki tilbúinn en í pósti fráfarandi skólastjóra Fossvogsskóla, Aðalbjargar Ingadóttur, segir að verklok séu áætluð í lok nóvember. Skólastarf mun því fara fram í um 2/3-hluta skólans fyrst um sinn.

Ætla ekki að senda börn sín aftur í skólann

Foreldrar sem Vísir hefur rætt við og voru á fundinum í kvöld segja mikla vankanta á upplýsingaflæði frá borginni. Fátt hafi verið um svör á fundinum, þar sem foreldrar hafi jafnframt fyrst fengið að vita af því að enn væru rakaskemmdir í austurhlið skólans. Þeim upplýsingum hafi verið óskað eftir á fundi í Bústaðakirkju í byrjun júní og ítrekað kallað eftir þeim síðan.

Þá beindist reiði foreldra á fundinum í kvöld einkum að því að munir úr skólanum, þ.e. stólar og bækur, hefði ekki verið fargað heldur fluttir aftur inn í bygginguna eftir hreinsun. Foreldrarnir fullyrða að forsvarsmenn Reykjavíkurborgar og skólans hafi lofað því að það yrði ekki gert en myglugró geta fest sig í yfirborði pappírs og í svampi, líkt og finna má í sessum stólanna. Foreldrarnir sátu sjálfir á umræddum stólum á fundinum í kvöld og voru margir sýnilega óánægðir með ráðahaginn.

Helgi Grímsson sviðsstjóri skóla- og frístundasviðs Reykjavíkurborgar sagði í viðtali við Mbl í mars að farið væri eftir leiðsögn sérfræðinga við frágang á hlutum úr skólanum. Hann benti þá á að ekki væri ráðlegt að taka bólstruð sæti og svamp með úr rýmum þar sem mygla hefur verið í, án hreinsunar eða útskiptingar.

Um bækurnar sagði hann að þeim yrði annað hvort hent eða kannað hvort hægt yrði að hreinsa þær. Bókasafnið var við útvegg þar sem varð mikill leki.

Þá herma heimildir Vísis að einhverjir foreldrar hafi ákveðið að senda börn sín ekki í Fossvogsskóla þegar skólahald hefst í næstu viku vegna ástandsins. Vísa þeir einkum til þess að komið hafi verið með bækurnar og stólana aftur inn í skólann, auk þess sem framkvæmdir við skólann hafi dregist þetta lengi. Þá hafi fulltrúar Reykjavíkurborgar ekki svarað nógu vel fyrir stöðu mála.