Fundu landa, stera og kannabisplöntur

Lögreglan á Suðurnesjum fann á sunnudaginn mikið magn landa, stera og kannabisplantna í húsnæði í umdæmi lögreglunnar. Leit var gerð í húsnæðinu að fenginni heimild og fundust þar einnig eimingartæki til áfengisframleiðslu.

Í tilkynningu frá lögreglunni segir að þegar lögregluþjóna hafi borið að garði hafi fáeinar kannabisplöntur í pottum og aðrar sem búið var að vefja inn í handklæði hafi blasið við. Þar að auki hafi kannabisfræ fundist.

Lögregluþjónar fundu einnig tugi ampúla sem talið er að innihaldi stera. Þá var hald lagt á rúmlega tuttugu hálfs lítra flöskur með landa og tvær fötur sem einnig innihéldu landa. Tveir karlmenn voru handteknir og er búið að yfirheyra þá.