Ferða­­tösku stolið fyrir utan hótel á Suður­­nesjum

Lögregla á Suðurnesjum var kölluð til eftir að tilkynnt var um þjófnað á ferðatösku fyrir utan hótel í umdæminu um helgina.

Í tilkynningu segir að viðkomandi hafi skilið eftir ferðatösku á bak við bíl sinn fyrir utan hótel í umdæminu. Þegar hann hafi svo vitjað töskunnar var hún horfin.

„Í upptökum úr eftirlitsmyndavél sást hvar ökumaður annarrar bifreiðar kom aðvífandi, gramsaði í töskunni og hafði hana svo á brott með sér.

Lögregla hafði uppi á manninum á höfuðborgarsvæðinu og í viðræðum þeirra viðurkenndi hann að vera með töskuna í bifreið sinni. Honum var gert að skila henni á stundinni og ætlaði hann að verða við því,“ segir í tilkynningunni.

Í pósti lögreglu segir einnig að erlendir ferðamenn hafi tilkynnt um þjófnað á bakpoka á höfuðborgarsvæðinu, en í honum voru dróni og fleiri munir.

Þá segir að tilkynnt hafi verið um innbrot í bát sem lá við festar í Grindavíkurhöfn. Sterk verkjalyf voru tekin úr lyfjakassa en einskis annars var saknað.