Kynna um­bóta­til­lögur ætluðum að lægja öldurnar í Líbanon

Búist er við að ríkisstjórnarflokkar Líbanons samþykki brátt röð frumvarpa sem snúa að efnahagsmálum með það að markmiði að lægja öldurnar í landinu. Mótmælin sem hafa staðið síðustu daga eru þau fjölmennustu í landinu í mörg ár.

BBC segir frá því að með lagabreytingunum verði laun háttsettra embættismanna helminguð og hætt verði við að koma á nýjum sköttum.

Mótmælin hafa nú staðið í fimm daga og hafa margir óskað eftir að boðað verði til allsherjarverkfalls í landinu. Blossuðu mótmælin upp eftir að tilkynnt var að til stæði að koma á skatti á myndbandssamtöl í spjallforritinu WhatsApp.

Sjá einnig:Þúsundir tóku víkingaklappið í mótmælum í Beirút

Mörg hundruð þúsund manna hafa tekið þátt í mótmælunum þar sem má sjá skilti með ákall gegn spillingu í stjórnkerfinu og niðurskurðaraðgerðum líbanskra stjórnvalda. Skuldastaða líbanska ríkisins er há og hagvöxtur lítill.

Forsætisráðherrann Saad Hariri hefur gefið stjórnarflokkunum 72 klukkustundir til að samþykkja umbótatillögurnar til að bregðast við ástandinu. Gaf hann í skyn að hann kynni að segja af sér verði tillögurnar ekki samþykktar af þinginu.

Mótmælendur hafa lokað vegum í miðborg höfuðborgarinnar Beirút. Sömuleiðis er búið að loka fjölda skóla, banka og háskóla.