Munaðurinn og dýrðin sem Kristín missti af

Veitingastaðurinn, eða klúbburinn, sem meinaði Kristínu Edwald lögmanni og veiðikonu inngöngu, er The Flyfisher´s Club sem er til húsa við Brook Street, fyrir ofan Savile Club. Kristín fékk ekki að fara inn einfaldlega vegna þess að staðurinn er einungis opinn körlum.

Vísir greindi frá málinu í síðustu viku og vakti frásögnin verulega athygli enda hljómar það fornfálega í eyrum Íslendinga að staður vilji setja sér slíkar reglur ári 2019. Kristín sagði við það tækifæri að hún vildi ekki sætta sig við mismunun af neinu tagi.

Verndari félagsins er sjálfur Karl Bretaprins

Samkvæmt heimildum Vísis er um að ræða stangveiðiklúbbinn Flyfisher´s Club og er þar um að ræða verulega gróna stofnun. Félagið var stofnað árið 1884 og státar það af því að meðal félaga eru ýmsir frægir veiðimenn. Þeirra helstur hlýtur að teljast sérlegur verndari staðarins sem er sjálfur Karl Bretaprins. Karl er auðvitað þekktur stangveiðimaður og hefur komið oft til Íslands til að renna fyrir lax.

Óhætt er að segja, þegar saga félagsins er skoðuð, að þar sé haldið fast í hefðirnar. Stefnan hefur verið hnoðuð saman í eftirfarandi þrjú atriði í lauslegri þýðingu Vísis:

Stuðla að samneyti herramanna sem hafa helgað sig fluguveiði almennt.

Finna leiðir til að samskipti milli þeirra sem eru áhugasamir um hina dásamlegu list megi verða sem best og mest.

Leggja til lesstofu þar sem finna má lesefni á ýmsum tungumálum hvar fjallað er um veiði, einkum fluguveiði, til að viðhalda þekkingu og upplýsingum um staði þar sem þar sem sveifla má stöng og gera að aðsetri upplýsinga um hvaðeina er viðkemur hinni eðlu listgrein.

Öruggt og notalegt athvarf stangveiðimannsins

Á heimasíðu The Flyfisher´s Club eru meðlimir hvattir til að líta á hin glæsilegu húsakynni sem sinn eftirlætis veiðikofa þar sem háttvísi og notalegt andrúmsloft er í fyrirrúmi. 

Þar eigi menn víst athvarf frá ysi og þys stórborgarinnar og yfir höfugum vínum á skaplegu verði og dýrindis matseðli sé upplagt að rifja upp ómetanlegar stundir á árbakkanum; baráttu við fisk hvort heldur sá slagur tapaðist eða vannst.

Kristín Edwald er ekki sú eina sem sett hefur hornin í þessar reglur um að einungis karlmenn megi koma þar inn fyrir dyr.

Lögmenn snéru uppá ný lög og bönnuðu konur alveg

Daily Mail fjallaði um staðinn fyrir nokkrum árum og þá einmitt í samhengi við það að Karl Bretaprins er sérlegur verndari hans og þá þetta bann við konum. Þar er greint frá því hvernig lögmenn staðarins brugðust við jafnréttislögum sem Harriet Harman kynnti á Bretlandseyjum árið 2010 og ætlað var að taka á mismunun gegn konum. Áður var það svo að meðlimir máttu bjóða gestum og þá konum við sérstök tækifæri þar inn en þó ekki til kvöldverðar eða hádegisverðar.

Túlkun lögmanna The Flyfisher´s Club var að lögin þýddu einfaldlega það að þeir þyrftu þá að skilgreina staðinn alfarið fyrir karlmenn og þeir hörmuðu að þeim væri ekki lengur fært að bjóða konum á staðinn. Varla hefur það verið ætlunin með hinum nýju lögum.

Í umfjöllun Daily Mail er vitnað í Fionu Amstrong, fyrrum fréttaþul hjá BBC, sem ritað hefur bækur um fluguveiðar. Hún segist gjarnan vilja vera meðlimur í þessum virðulega klúbbi, og það sé synd og skömm að það skuli ekki vera inni í myndinni; margar konur séu einmitt góðir stangveiðimenn og að það hafi verið kona sem veitt hefur stærsta laxinn sem fengist hefur á flugu. Fiona sótti um aðild en fékk þau svör að konur væru ekki velkomnar. Hún hefur birst í tímariti sem þeir gefa út, Flyfishers´Journal og þykir skjóta skökku við að það sé hægt að birta mynd af henni þar en ekki veita henni aðgengi að félaginu. Henni þykir að á 21. öldinni væri ráð að vera sveigjanlegri í þessum efnum.