Dregur til tíðinda á föstudag eftir rólega daga

Rólegra veður er í vændum næstu daga en verið hefur undanfarið, ef marka má hugleiðingar veðurfræðings á vef Veðurstofu Íslands: „Skilin sem hafa strítt okkur með sínum óútreiknanlegu lægðahnútum eru nú að trosna yfir landið.“ Næst dregur til tíðinda í veðrinu á föstudag.

Búast má við suðaustan- og austangolu eða -kalda í dag með skúrakenndri úrkomu, jafnvel slydduéljum, sunnan- og vestanlands. Þurrt að mestu á Norður- og Austurlandi.

Köld norðaustanátt færist svo yfir í nótt og á morgun með éljum norðaustantil en léttir til sunnan- og vestanlands. Fremur rólegur vindur og frystir þá um mestallt land. Svipað veður á fimmtudag en breyting verður á um helgina.

„Það dregur síðan til tíðinda á föstudag þegar næstu skil koma að landi úr vestri en þau virðast ætla að sigla hratt yfir landið og í kjölfar þeirra kólnar aftur í útsynningi með éljum,“ segir í hugleiðingum veðurfræðings.

Veðurhorfur á landinu næstu daga

Á miðvikudag:

Norðaustlæg átt 3-10 m/s og dálítil él NA-lands, en léttskýjað um landið sunnan- og vestanvert. Frost víða 0 til 7 stig og talsvert næturfrost inn til landsins.

Á fimmtudag:

Norðlæg átt, 3-10 m/s og léttskýjað, en lítilsháttar él með NA-ströndinni. Áfram frost um mest allt land, einkum inn til landsins. Vaxandi sunnanátt vestast um kvöldið og þykknar upp.

Á föstudag:

Hvöss sunnanátt með talsverðri rigningu og hlýnar, en slyddu eða snjókomu í fyrstu fyrir norðan. Vestlægari með deginum, fyrst V-til undir hádegi, með skúrum eða éljum og kólnar aftur.

Á laugardag:

Suðvestlæg átt, 5-13 og él, en léttskýjað A-til á landinu. Víða frostlaust við V-ströndina, en annars frost 1 til 7 stig og kaldast í innsveitum NA-lands.

Á sunnudag:

Dregur úr vindi og éljum og áfram bjart A-lands. Hiti breytist lítið.

Á mánudag:

Útlit fyrir stífa suðaustanátt með rigningu, en þurrt NA-lands. Hlýnandi.