Allt að 15 stiga hiti á morgun

Víðáttumikið lægðakerfi norður af Nýfundnalandi sendir nú regnsvæði og sunnanstrekking til landsins. Á morgun er útlit fyrir að enn bæti í vind og rigningu, auk þess sem það heldur áfram að hlýna. Þannig gæti hiti náð allt að fimmtán stigum „þar sem best lætur í hnjúkaþey norðanlands“, að því er segir í hugleiðingum veðurfræðings á vef Veðurstofu Íslands.

Í dag gæti vindur jafnframt magnast töluvert staðbundið á norðanverðu Snæfellsnesi. Undir kvöld og fram að miðnætti má búast við hvassviðri þar eða jafnvel stormi í vindstrengjum.

Norðaustan og austanlands verður vindur hægur í dag og þurrt að mestu. Hitinn þokast svo upp á við með sunnanáttinni og í kvöld má búast við um þremur til átta stigum. Hiti verður þó um frostmark norðaustantil. Á morgun hlýnar svo enn frekar, eins og áður sagði.

Veðurhorfur á landinu næstu daga

Á mánudag:

Sunnan og suðvestan 13-20 m/s með rigningu og súld, en úrkomulítið á Austurlandi. Hiti 7 til 15 stig, hlýjast norðanlands.

Á þriðjudag:

Suðlæg átt og rigning, en þurrt að kalla norðaustanlands. Vestlægari um kvöldið á vestanverðu landinu með éljum og kólnar.

Á miðvikudag:

Ákveðin suðvestan- og vestanátt með éljagangi, en bjartviðri norðaustan- og austanlands. Kólnandi, frost 0 til 5 stig seinnipartinn.

Á fimmtudag:

Vestlæg átt og dálítil él, en þurrt á Suðausturlandi og Austfjörðum. Frost 0 til 10 stig, mest inn til landsins.

Á föstudag:

Útlit fyrir norðanátt með snjókomu eða éljum, en léttskýjað sunnan- og vestanlands. Frost 0 til 5 stig.

Á laugardag:

Snýst líklega í suðaustanátt og þykknar upp á Suður- og Vesturlandi, en léttir til fyrir norðan og austan