Fyrr­verandi yfir­maður danska hersins dæmdur í fangelsi

Dómstóll í Viborg í Danmörku hefur dæmt Hans-Christian Mathiesen, fyrrverandi yfirmann danska hersins, í sextíu daga óskilorðsbundið fangelsi fyrir að hafa misnotað vald sitt.

Danskir fjölmiðlar segja hann hafa breytt inntökuskilyrðum í herinn til að greiða leið fyrir kærustu sína til að hún fengi þar stöðu.

Verjandi Mathiesen segir að dómnum hafi verið áfrýjað á staðnum.

Dómurinn var einróma í afstöðu sinni um sekt Mathiesen, en ekki um lengd refsingar. Tveir dómaranna vildu sextíu daga fangelsisdóm, en sá þriðji vildi að Mathiesen yrði dæmdur í níutíu daga fangelsi.

Auk þess að vera dæmdur fyrir valdamisnotkun var hann dæmdur fyrir vanrækslu í starfi og fyrir að hafa látið trúnaðarupplýsingar af hendi.

Mathiesen tók við stöðu yfirmanns hersins árið 2014, en var látinn hætta eftir að upp komst um málið árið 2018.