Gæti orðið 22 stiga hiti

Suðaustan strekkingur verður víðast hvar á landinu í dag en þó hægari vindur norðvestanlands. Að mestu skýjað á vesturhelmingi landsins en bjart um landið austanvert. Dálítil súld með köflum sunnantil, annars þurrt að kalla. Áfram er hlýtt norðanlands og hiti gæti náð 22 stigum.

Öllu svalara er á Austfjörðum en þar er útlit fyrir viðvarandi þokuloft og hita um 10 stig.

Fremur hlýjar sunnan- og austanáttir verða ráðandi næstu daga með vætu af og til, einkum um sunnanvert landið, að því er fram kemur í hugleiðingum Veðurfræðings á vef Veðurstofu Íslands.

Veðurhorfur á landinu næstu daga

Á föstudag:

Austlæg átt, 3-10 m/s og bjart með köflum. Gengur í austan 10-15 og fer að rigna sunnantil á landinu um kvöldið. Hiti 10 til 20 stig, svalast suðaustanlands.

Á laugardag (sumarsólstöður):

Suðaustan 8-13 m/s og rigning með köflum, en þurrt norðaustantil. Hiti 12 til 21 stig, hlýjast norðanlands.

Á sunnudag:

Austan 10-15 og dálítil rigning, einkum með suður- og austurströndinni, en þurrt að kalla um norðanlands. Hiti 10 til 20 stig, hlýjast norðantil.

Á mánudag:

Suðaustlæg átt og dálítil rigning með köflum, en þurrt norðaustanlands. Hiti 10 til 18 stig.

Á þriðjudag:

Suðaustanátt og dálítil rigning, einkum suðaustantil, en að mestu þurrt norðaustanlands. Hiti breytist lítið.

Á miðvikudag:

Útlit fyrir breytilega átt og vætu í öllum landshlutum. Áfram hlýtt í veðri.