ÍTF fordæmir hegðun Þórsara - Málið til skoðunar hjá KSÍ

„Mér finnst þetta fyrst og fremst óheppilegt að öllu leyti, því þarna er bara verið að brjóta landslög,“ segir Birgir Jóhannsson, framkvæmdastjóri Íslensks toppfótbolta, um það að Þórsarar skyldu auglýsa erlenda veðmálasíðu eftir fyrsta leik sinn í Lengjudeildinni í sumar.

Tveir leikmenn og þjálfari Þórs mættu í myndbandsviðtöl við Fótbolta.net með derhúfu á höfðinu, merkta Coolbet. Tilgangur þess hefur ekki verið gerður opinber en leiða má að því líkum að Þórsarar hafi viljað vekja athygli á því að á meðan að milljónum er veðjað á íslenska leiki í hverri viku hjá erlendum veðmálafyrirtækjum mega þessi fyrirtæki lögum samkvæmt ekki gera auglýsingasamninga við félögin hverra lið spila leikina.

Skaðar málið ímynd knattspyrnunnar?

Óðinn Svan Óðinsson, formaður knattspyrnudeildar Þórs, baðst undan viðtali í morgun og sagði Þórsara ætla að ræða saman síðar í dag. Klara Bjartmarz, framkvæmdastjóri KSÍ, sagði málið til skoðunar hjá sambandinu. Eitt af því sem kemur til greina er að Klara vísi málinu til aga- og úrskurðarnefndar á þeim forsendum að það hafi skaðað ímynd knattspyrnunnar.

„Það er eitt af því sem við erum að skoða. Ég held að það séu nú engin fordæmi fyrir máli sem þessu svo við erum að skoða reglugerðir sambandsins og slíkt, til að átta okkur á hvernig þetta mál snýr. Þetta lítur út fyrir að vera brot á landslögum,“ segir Klara við Vísi.

Þó að Íslenskur toppfótbolti, ÍTF, hafi ekki beitt sér fyrir breytingum á þessum lögum er ljóst að það angrar ýmsa að íþróttafélögin geti ekki nýtt sér áhuga erlendra veðmálafyrirtækja á samstarfi.

„Þetta eru lögin í landinu og við höfum ekki verið að ýta við þeim. En þessi staða fer vissulega í taugarnar á manni. Maður myndi vilja að annað hvort væri betur lokað á þetta – að ekki væri hægt að nota erlendar veðmálasíður á Íslandi eins auðveldlega og í dag, og þar af leiðandi færu meiri peningar í gegnum Íslenska getspá sem myndu skila sér til íþróttafélaganna – eða þá að þetta væri alveg opið,“ segir Birgir.

„Ekki það sem ÍTF stendur fyrir“

Birgir tekur undir að það sé ansi óheppilegt að þetta mál komi upp núna, rúmum hálfum mánuði eftir að ÍTF, sem eru samtök félaga í efstu deildum Íslands, undir markaðsréttindasamning við Íslenskar getraunir. Þó sjálfsagt hafi það ekki verið tilgangur Þórsara má segja að þeir hafi gefið ÍG langt nef með því að auglýsa Coolbet eftir fyrsta leik sinn í hinni nýju Lengjudeild:

„Þetta er kannski ekki samningsbrot, því það er bara ólöglegt í landinu að auglýsa erlendar veðmálasíður. Maður býr ekki til samning og reiknar með því að menn brjóti landslög. Þetta hefur því ekki áhrif á samninginn sem slíkan, en það er óheppilegt að svona komi upp í fyrstu umferð. Við fordæmum þetta, og þetta er ekki það sem ÍTF stendur fyrir,“ segir Birgir.