Hátt í hundrað far­þegar ná­lægt því að sleppa skimun

Mistök við opnun landgönguhliða á Keflavíkurflugvelli urðu til þess að farþegar flugvélar Wizz Air frá Katowice í Póllandi til Keflavíkur gengu fram hjá skimunarsvæði flugstöðvarinnar. Lögreglan áttaði sig á mistökunum og sá til þess að farþegarnir gengjust undir skimun áður en þeim var hleypt í gegn um flugstöðina.

Þetta kom fram í samtali Vísis við Sigurgeir Sigmundsson, yfirlögregluþjón flugstöðvardeildar lögreglunnar á Suðurnesjum. Hann segir mannleg mistök hjá stjórnstöð Isavia hafa valdið þessu. Búið sé að fara yfir málið og tryggja að ekkert þessu líkt komi fyrir aftur.

Vélin lenti klukkan 18:16, um rúmum hálftíma á undan áætlun. Sigurgeir segir að lendingartími vélarinnar hafi þó ekki haft með það að gera að farþegarnir hafi farið fram hjá skimunarsvæðinu. Eins segir hann að náðst hafi í alla farþega vélarinnar áður en þeir héldu leiðar sinnar, og þeir hafi allir verið skimaðir.

Niðurstöður skimunar á farþegunum ættu að liggja fyrir seint í kvöld eða í fyrramálið. Tölur um ný smit kórónuveirunnar hér á landi birtast klukkan 13 á hverjum degi, á vefsíðunni covid.is.