Mjög á­nægð með nýtt merki og treyju KSÍ | Virðist klæða alla jafn vel

Knattspyrnusamband Íslands tilkynnti í gær nýtt merki landsliðsins sem mun prýða treyjur íslensku landsliðanna í fótbolta næstu árin. Þá mátti sjá nýja landsliðsbúninga en Ísland hefur sagt skilið við Errea og mun nú leika í Puma. 

Vísir heyrði í tveimur sérfræðinga þegar kemur að hönnun og stíl til að ræða nýtt treyjuna og merkið.

Álfrún Pálsdóttir er kynningastjóri hjá Miðstöð hönnunar og arkitektúr. Þá er hún fyrrum ritstjóri tímaritsins Glamour ásamt því að vera mikil áhugamanneskja um fótboltabúninga almennt. 

Sindri Snær Jensson, fyrrum markvörður KR, rekur fataverslunina Húrra Reykjavík sem eru staðsett á tveimur stöðum á Hverfisgötu ásamt því að reka veitingastaðina Yuzu og Flatey Pizza.

Fyrstu viðbrögð mjög jákvæð

„Mér finnst þetta koma skemmtilega á óvart. Það lýtur allt mjög vel út og er mjög fagmannlegt miðað við það sem ég hef séð til þessa,“ sagði Álfrún og hélt áfram.

„Fyrstu kynni eða first impression eru mjög góð. Þessi heiðblái litur er mjög flottur og vonandi verður hann í forgrunni. Vona að búningurinn allur verði í þeim stíl, stuttbuxurnar og sokkarnir líka.“ 

„Þetta er bara svakalega vel gert hjá þeim. Kynningin og allt mjög vel gert,“ sagði Sindri Snær um kynningu KSÍ.

„Frammistaðan á vellinum hjá landsliðinu hefur verið mjög góð undanfarin ár en markaðsmál hjá KSÍ hafa kannski ekki verið alveg upp á tíu. Þetta er hins vegar stórt og gott skref í rétta átt. Búningurinn sjálfur er síðan rosalega flottur,“ sagði Sindri ennfremur. 

„Ég er mjög hrifin af retro-línunni sem er verið að vinna með. Minnir mjög á gömlu Adidas-gallana sem voru vinsælir á sínum tíma. Ég held að loksins sé kominn fatnaður sem gerir stuðningsmönnum kleift að vera smart í stúkunni. Loksins er hægt að klæða börn, og í rauninni alla fjölskylduna. Þessi blái litur ætti að fara flestum vel og þessi retro-lína höfðar til mín,“ sagði Álfrún um hönnun búningsins. 

Sindri var mjög jákvæður varðandi merkið, treyjuna og kynningu KSÍ í heild sinni en hafði þó eina litla athugasemd. 

„Leturgerðin er kannski of rúnaleg ef svo má að orði komast, aðeins of mikið um rúnir og víkingaþema fyrir minn smekk.“

Er einhvern tímann of seint að gera góða hluti?

Aðspurður hvort KSÍ hefði mögulega mátt gera eitthvað í þessa veru fyrr svaraði Sindri einfaldlega  með spurningunni hér að ofan. Álfrún tók svo í sama streng en hún telur að íslenska þjóðin sé langt því frá búin að fá leið á íslensku landsliðunum.

„Það er mjög jákvætt að taka næsta skref og ég held að fólk sé mjög spennt fyrir þessu. Held að við séum alls ekki búin að ná hápunktinum hvað varðar almennt „pepp“ fyrir landsliðinu. Fólk er orðið mjög þyrst í landsleiki á Laugardalsvelli og þá var Sara Björk Gunnarsdóttir að skrifa undir við stærsta félagslið í kvennaknattspyrnu svo við erum langt frá hápunktinum að mínu mati. Þetta mun bara auka spennuna fyrir íslenska landsliðinu.“

Allt annað líf að vera komin í Puma

„Puma er auðvitað margfalt stærra merki en Errea. Það virðist vera miklu flottara og betra snið á búningnum. Það verður miklu fleira fólk í þessari treyju heldur en þessum frá Errea. Ef það kemur flottur varningur eins og KSÍ er búið að auglýsa er ljóst að hann mun rjúka út," sagði Sindri um vistaskipti Íslands úr Errea í Puma.

„Það er mjög gaman að vera komin í Puma, við erum í raun komin í allt aðra deild með þeim skiptum og ég er mjög spennt að sjá allan gallann hjá KSÍ. Svo er mjög gott snið á treyjunni. Hún virðist klæða bæði kyn sem er eitthvað sem hefur oft vantað með svona treyjum. Þær eru hannaðar á stráka og stelpurnar þurfa bara að vera í þeim. Það er fallegt hálsmál á henni og mér finnst mjög gott að halda rauða litnum í lágmarki,“ sagði Álfrún um nýtt snið búningsins sem sjá má hér að ofan.

Bæði mjög líkleg til að kaupa sér treyju

„Hugsa að ef ég neyðist til að klæðast einhverju fótboltatengdu þá yrði þessi nýja retro-lína fyrir valinu,“ sagði Álfrún að lokum.

„Ég verð allavega með þeim fyrstu að fá mér treyju, það er ljóst,“ sagði Sindri að lokum.