Fjölskyldustæði fyrir barnafólk

Forsvarsmenn Krónunnar vinna nú að því að fjölga svokölluðum fjölskyldustæðum fyrir utan verslanir fyrirtækisins. Eins og nafnið gefur til kynna er þar um að ræða bílastæði sem sérstaklega eru ætluð barnafólki og eiga að auðvelda foreldrum eða þunguðum konum að athafna sig við verslunarferðina.

Stæðin eru gul á lit og hafa þegar verið sett upp við flestar verslanir Krónunnar, að sögn markaðstjóra keðjunnar í Morgunblaðinu. Fjölskyldustæðin hafi verið prufukeyrð í Garðabæ og gefið svo góða raun að ákveðið var að setja þetta við allar verslanir Krónunnar þar sem þau hafa bílastæði til umráða.

Fjölskyldustæði sem þessi þekkjast víða, t.a.m. í Skandinavíu, og þá hefur Ikea í Kauptúni boðið upp á sambærileg stæði um nokkurt skeið. „Okkar stærsti markhópur er fjölskyldufólk. Við vildum auka þjónustuna fyrir þá sem eru með börn og ófrískar konur og bæta aðgengið,“ segir Hjördís Elsa Ásgeirsdóttir, markaðsstjóri Krónunnar.