Katrín Tanja þurfti að kafa djúpt til að komast í gegnum síðustu mánuði ársins

Íslenska CrossFit drottningin Katrín Tanja Davíðsdóttir hafði nóg að gera á árinu 2019 og hún hefur nú gert upp þetta viðburðaríka og krefjandi ár sitt.

„Árið 2019 hjá mér var stórkostlegt á svo mörgum sviðum en það var líka mjög krefjandi á öllum vígstöðvum,“ skrifaði Katrín Tanja í uppgjörpistil sinn á Instagram.

Katrínu hefur oft gengið betur í sjálfum CrossFit keppnunum en hún stóð sig einstaklega vel sem eins aðalsendiherra íþróttarinnar sinnar. Þar var líka mikið að gera.

„Ég gaf út mína fyrstu bók, ég fékk að vera með í ESPN Body issue sem var eitt það brjálaðasta og mest valdeflandi sem ég hef gert á minni ævi. Ég fékk að ferðast út um allan heim til að keppa og skoða mig um,“ skrifaði Katrín Tanja og hélt áfram.

„Ég keppti á mínum sjöundu heimsleikum og hélt áfram að setja þá pressa á sjálfa mig að vera sú besta sem ég gat orðið. Ég eignaðist líka litla frænku og hún ein stærsti sólargeisli sem þessi heimur hefur séð,“ skrifar Katrín Tanja.

Katrín kom líka fram fyrir hönd íþróttar sinnar á ráðstefnu ESPN um kvennaíþróttir þar sem hún heillaði alla upp úr skónum með ræðu sinni og svörum.

Katrín fer líka yfir erfiðleika ársins og þá sérstaklega lok ársins þar sem hún glímdi við bakmeiðsli sem meðal annars kostuðu hana þátttöku á Dubai CrossFit Championship eins og frægt varð.

„Þetta ár hefur líka verið eitt mesta krefjandi ár á mínum ferli og það á mörgum vígstöðvum. Ég trúi því innilega að við göngum aldrei í gegnum neitt nema ef að við þurfum á því að halda og að allt hafi sinn tilgang. Ég hef þurft að vinna mikið í sjálfri mér og síðustu mánuði hef ég þurft að kafa djúpt og þroskast mikið,“ skrifar Katrín. Hún hefur áður nefnt það að ákvörðrun að hætta við að keppa í Dúbaí hafi verið ein sú allra erfiðasta á hennar ferli.

Katrín Tanja horfir samt bjartsýn inn í nýja árið þar sem aðalverkefnið verður væntanlega að keppa á áttundu heimsleikunum næsta haust.

„Ég er svo tilbúin í árið 2020 og ég hef góða tilfinningu fyrir þessu ári. Ég er heppin að hafa fólkið mitt við hlið mér. Ég elska líka tölur og hvað þá tölu eins og 2020,“ skrifar Katrín en það má sjá alla færslu hennar hér fyrir neðan.