Gísli Örn á fullu í ver­búðum og byrjaður í kaffinu á morgnana

Á laugardögum ætlar Atvinnulíf að eiga kaffispjall við fólk sem er í ólíkum stjórnendastöðum og þá helst einstaklinga sem við sjáum sjaldnast í viðskiptafréttum eða veltum fyrir okkur sem stjórnanda.

Til að átta okkur aðeins á hverjum karakter munum við alltaf spyrja um:  Hvenær vaknar þú á morgnana, hvað er það fyrsta sem þú gerir þá og hvenær ferðu að sofa á kvöldin.  Við spyrjum líka um skipulagið.

Kaffispjall dagsins er við leikstjórann og leikarann Gísla Örn Garðarson.

Hvenær vaknar þú á morgnana?

,,Klukkan 07.20“

Hvað er það fyrsta sem þú gerir á morgnana?

,,Spyr börnin hvort það séu ekki allir til í 10 mínútur í viðbót.

Svo því miður kíki ég allt of snemma á símann og er farinn að gera eitthvað sem ég gerði aldrei áður, sem er að fá mér kaffi fyrst af öllu.“ 

Hvernig myndir þú lýsa þér sem barni og getur þú tengt þá lýsingu við það sem þú gerir í dag?

,,Ætli ég myndi ekki segja að ég hafi helst til verið hlédrægur. Kurteis og frekar rólegur. Ég eyddi svo mörgum dögum í fimleikasal að ég gerði varla neitt annað.

Ég er ekki eins feiminn og ég var. Ég er orðinn betri í að tjá mig líklega.

En færðist að öðru leiti mikið til úr fimleikasalnum yfir í leikhúsið.“ 

Hvað ertu helst að sýsla við þessa dagana?

,,Ég er að undirbúa framleiðslu á 8 þátta sjónvarpsseríu sem ber heitið Verbúðin. Þetta er eitt viðamesta verkefni sem ég hef fengist við, svo það er lítill tími fyrir annað sem stendur. Tökur hefjast í mars og standa fram í júlí.

Auk þess er ég samt með nokkur spennandi leikhúsverkefni á teikniborðinu.“

Sjá einnig:  Borgarleikhúsið setur upp verk um Villa Vill: „Tvær hliðar á sömu plötunni“

Hvernig skipuleggur þú þig í vinnu?

,,Ég treysti á að ég muni það mikilvægasta. Minnið hentar mér ágætlega, því stundum fæ ég hugmyndir sem mér þykja frábærar, en svo er ég kannski búinn að gleyma þeim eftir nokkra daga, sem segir mér að þær voru kannski ekkert sérstakar.

Varðandi dags daglega hluti eins og fundi og þess háttar, þá reyni ég að muna að setja það í síman.  Annars lendi ég of oft í að gleyma því.“ 

Hvenær ferðu að sofa á kvöldin?

,,Reyni eftir fremsta megni að ná í svefn fyrir miðnætti.“