Stýrihópur hefur verið skipaður til að vinna að framkvæmdaáætlun fyrir líffræðilega fjölbreytni

Lundi, fjöruspói, landselur og sléttbakur eru meðal fugla- og dýrategunda sem eru í bráðri hættu hér á landi. Stýrihópur hefur verið skipaður til að vinna að framkvæmdaáætlun fyrir líffræðilega fjölbreytni, en vísindamenn telja að ein milljón dýra- og plöntutegunda séu núíútrýmingarhættu í heiminum.

Guðmundir Ingi Guðbrandsson, umhverfis- og auðlindaráðherra hefur skipað stýrihóp til að vinna að nýrri stefnumótun og framkvæmdaáætlun fyrir líffræðilega fjölbreytni hér á landi.

„Líffræðileg fjölbreytni er samheiti yfir fjölbreytileika lífsins, náttúrunnar. Þetta er eitt af þessum stóru viðfangefnum á sviði umhverfis og náttúruverndar,“ sagði Jón Geir Pétursson, formaður Stýrihópsins.

Núverandi stefna í þessum málum er frá árinu 2008 og segir Jón Geir hana komna til ára sinna.

„Loftslagsbreytingar hafa fengið mjög mikla áherslu alþjóðlega og réttilega. Þetta er hin stóra víddin í því að ræða um umhverfisbreytingar í heiminum af því að við höfum verið að sjá svo mikla hnignun og fækkun tegunda og vistkerfa og það er verið að ganga á náttúruleg svæði,“ sagði Jón Geir.

Líffræðilegri fjölbreytni hefur hnignað verulega á alþjóðavísu undanfarin ár og telja vísindamenn að ein milljón dýra- og plöntutegunda séu nú í útrýmingarhættu í heiminum. Náttúrufræðistofnun Íslands hefur tekið saman rauðlista yfir plöntur og dýr hérlendis sem eiga undir högg að sækja.

Dæmi um stofna sem eru í bráðri hættu eru dýrategundirnar Fjöruspói, Lundi, landselur og Sléttbakur en æðplönturnar eru til dæmis Mosaburnkni, Skeggburkni og Glitrós.

Ísland er aðili að samningi Sameinuðu Þjóðanna um líffræðilega fjölbreytni, en í október er gert ráð fyrir stóru aðildarríkjaþingi í Kína.

„Og þar eru væntingar að það geti orðið alþjóðleg tímamót svipað og Parísarsamkomulagið var með loftslagsmálin þar sem verði dregið betur fram hvaða aðferðafræði og nálganir ríki heims ætla að koma sér saman um til þess að tryggja vernd og sjálfbæra nýtingu líffræðilegrar fjölbreytni til frambúðar,“ sagði Jón Geir.