Fyrr­verandi for­seti Inter­pol dæmdur í þrettán ára fangelsi

Dómstóll í Kína hefur dæmt Meng Hongwei, fyrrverandi forseta Interpol, í þrettán og hálfs árs fangelsi fyrir fjársvik. Hann játaði sök í málinu síðasta sumar.

Meng hlaut dóm fyrir að hafa þegið um fjórtán milljónir yuan, um 260 milljónir króna, í mútur á árunum 2005 til 2017. Auk fangelsisdómsins var Meng dæmdur til greiðslu um 36 milljón króna sektar.

Kínversk yfirvöld greindu frá því í október 2018 að Meng, þáverandi forseti Interpol, væri til rannsóknar vegna gruns um fjármálamisferli. Meng hafði þá verið saknað í nokkrar vikur, en það var eiginkona hans til tilkynnti að hann hefði ekki skilað sér heim til Frakklands eftir ferð til Kína. Síðar kom fram að hann væri í haldi í heimalandinu.

Meng Hongwei var aðstoðaröryggismálaráðherra Kína áður en hann tók við embætti forseta Interpol. Hann var rekinn úr Kommúnistaflokknum í mars 2019 og var það liður í herferð Xi Jinping Kínaforseta gegn spillingu.

Meng tók við embætti forseta Interpol árið 2016, en lét af embætti haustið 2018 eftir að hann var handtekinn.