Svarar Trump og segir ástandið í ríkjum þeirra ekki sambærilegt

Jacinda Ardern forsætisráðherra Nýja Sjálands hefur svarað Donald Trump Bandaríkjaforseta fullum hálsi en hann tók Nýja Sjáland sem dæmi um land þar sem nýja kórónuveiran væri að fara úr böndunum á nýjan leik. Í ræðu sem Trump hélt í gærkvöldi hæddist hann að Nýsjálendingum fyrir að hafa hrósað sigri í baráttunni við veiruna sem hafi svo skotið upp kollinum á nýjan leik og að þar væri veiran á mikilli siglingu.

Engin smit greindust í Nýja Sjálandi í hundrað og tvo daga en á dögunum greindust smit að nýju í borginni Auckland. Trump sleppti því þó að fara út í smáatriðin, en smitin í seinni bylgjunni í Auckland eru þó aðeins 69 í heildina.

Á mánudag greindust þar níu smit en á sama tíma greindust 42 þúsund smit í Bandaríkjunum. Í heild hafa tuttugu og tveir látist af völdum Covid 19 á Nýja Sjálandi en í Bandaríkjunum er tala látinna komin yfir 170 þúsund manns, hvergi hafa dauðsföllin verið fleiri. Ardern brást við orðum Trumps og benti á að löndin tvö væru engan vegin samanburðarhæf þegar kemur að kórónuveirunni.