Finnur fyrir ein­kennum og fer í sýna­töku

Sanna Marin, forsætisráðherra Finnlands, hefur greint frá því að hún hafi fundið fyrir einkennum kórónuveirusýkingar í öndunarfærum. Hún ætli sér að fara í sýnatöku og mun sinna störfum sínum í fjarvinnu þar til að niðurstaða liggur fyrir.

Marin greinir frá þessu á Twitter-síðu sinni, og segir hún einkennin sín vera væg.

Á dagskrá forsætisráðherrans í dag er sumarfundur þingflokks Jafnaðarmannaflokksins og ríkisstjórnarfundur þar sem fyrirkomulag á landamærum verður til umræðu.

Þetta er ekki í fyrsta sinn sem finnski forsætisráðherrann ákveður að stunda fjarvinnu vegna gruns um kórónuveirusmit en hið sama gerðist í apríl síðastliðinn.