Flatey Pizza opnar á Garðatorgi

Veitingastaðurinn Flatey Pizza opnar á Garðatorgi í byrjun maí, ef allt gengur samkvæmt áætlun. Þetta staðfestir Sindri Snær Jensson einn eigenda staðarins í samtali við Vísi.

Flateyjarútibúið á Garðatorgi verður það þriðja sem opnar á höfuðborgarsvæðinu. Fyrir eru staðirnir úti á Granda og á Hlemmi mathöll. Miðað er við að nýi staðurinn opni eftir rétt rúma tvo mánuði í húsnæði sem áður hýsti veitingastaðinn Nu Asian að Garðatorgi 6.

„Tímaramminn er sirka tveir mánuðir. Við vorum að taka við lyklunum,“ segir Sindri. „Við þurfum að fara í smávægilegar breytingar á útliti og fá pítsaofn inn.“

Útlit staðarins við Garðatorg verður með svipuðu móti og úti á Granda. Sá fyrrnefndi er þó aðeins stærri og mun því geta tekið fleiri í sæti, auk þess sem lögð verður frekari áhersla á „take-away“-þjónustu í Garðabænum, að sögn Sindra.

„Við erum rosalega spenntir að geta komist nær Garðabæ, Kópavogi og Hafnarfirði,“ segir Sindri, enda hinir staðirnir tveir báðir í vesturhluta borgarinnar.

Tilkynnt var um opnun Flateyjar við Garðatorg á Twitter í morgun og þegar hafa samfélagsmiðlanotendur, sem margir eru eflaust búsettir í Garðabæ, lýst yfir ánægju með tíðindin, líkt og sjá má hér að neðan.