Boca Juniors byrjar með handboltalið

Handboltinn heldur áfram að vaxa utan Evrópu og nú hefur argentínska félagið Boca Juniors tilkynnt að það ætli sér að byrja með handboltalið.

Handbolti er vinsæl íþróttagrein í Suður-Ameríku og hefur verið lengi. Er handbolti til að mynda kenndur í leikfimi í löndum eins og Brasilíu en mikið hefur vantað upp á að fylgja starfinu þar eftir.

Það er þó allt að koma og tilkoma Boca inn í handboltaheiminn mun líklega hafa mikil áhrif á handboltann þar í landi en hann hefur verið á uppleið þar sem og í Brasilíu síðustu ár.

Argentínumenn hafa verið að sýna framfarir á síðustu heimsmeistaramótum og þeir ætla sér mun lengra.

Þeirra lið verður á ÓL í Japan í sumar en Spánverjinn Manolo Cadenas þjálfar argentínska liðið í dag.