Ari orðinn leikmaður Strömsgodset

Miðvörðurinn Ari Leifsson er genginn til liðs við norska úrvalsdeildarfélagið Strömsgodset frá uppeldisfélagi sínu Fylki.

Ari, sem er 21 árs gamall, hefur átt fast sæti í vörn Fylkis síðustu tvær leiktíðir og samtals leikið 46 leiki í efstu deild á sínum ferli. Hann á að baki 14 leiki fyrir U21-landsliðið og lék sinn fyrsta A-landsleik í janúar, gegn El Salvador í Bandaríkjunum.

Ari skrifaði undir samning við Strömsgodset sem gildir út leiktíðina 2023.

„Við höfum fylgst með Ara í góðan tíma og fengið góð meðmæli með honum frá fólki sem fylgist vel með íslenska fótboltanum. Ari er ungur og efnilegur miðvörður með mikla burði til að ná langt, og hæfileikar hans falla vel að okkar leikstíl,“ sagði Jostein Flo, íþróttastjóri Strömsgodset.

„Ég kom hingað því að Strömsgodset hefur sýnt að félagið vill treysta á unga leikmenn og ég tel að þetta sé rétt skref á mínum ferli. Ég hef talað við þjálfarann og mér líkar vel við hans hugmyndafræði. Ég held að mínir hæfileikar passi vel inn í þetta kerfi,“ sagði Ari sem er lýst sem vel spilandi leikmanni sem sé jafnvígur á báða fætur.

Keppni í nosrku úrvalsdeildinni hefst í byrjun apríl. Strömsgodset endaði í 11. sæti af 16 liðum á síðustu leiktíð.