Margslungið veður í kortunum

Það er margslungið veður í kortunum þessa dagana, eins og það er orðað í hugleiðingum veðurfræðings á vef Veðurstofu Íslands þennan morguninn.

Versta veðurútlitið er á norðvestanverðu landinu þar sem spáð er norðaustan stormi eða roki með snjókomu í dag og á morgun þótt gera megi ráð fyrir að það dúri um tíma í dag.

Norðan- og austanlands er austan hvassviðri í fyrstu og fylgir því talsverð úrkoma fyrir austan en sunnanlands hefur vindur snúist í hægari suðlæga átt með skúrum eða éljum.

Vindur snýst einnig til suðlægrar áttar norðan- og austanlands í dag og þá styttir upp á þeim slóðum.

„Bætir í vind með éljagangi norðaustanlands eftir hádegi á morgun, en fer veðrið að ganga niður annað kvöld. Þegar líður á miðvikudag ætti því að vera orðið skaplegt veður á landinu. Fimmtudagur lítur vel út og gott að nýta hann vel til útivistar því næsta lægðakerfi nálgast úr suðvestri og má búast við miklum umhleypingum um næstu helgi,“ segir í hugleiðingum veðurfræðings.

Rétt er að vekja athygli á appelsínugulri veðurviðvörun sem tók gildi á Vestfjörðum í nótt og er hún í gildi til klukkan 13 í dag. Um norðaustan stórhríð er að ræða:  

Norðaustan stormur eða rok, 20-25 m/s, með talsverðri snjókomu. Búast má við miklum skafrenningi með lélegu skyggni og slæmum akstursskilyrðum. Ekkert ferðaveður.

Veðurhorfur á landinu:

Austlæg átt 15-23 m/s og snjókoma eða slydda, en talsverð slydda eða rigning suðaustan og austanlands. Dregur úr vindi og úrkomu með morgninum, fyrst suðvestantil, en áfram hvassviðri á Vestfjörðum. Norðaustan stormur eða rok og aukin ofankoma um landið norðvestantil í kvöld.

Suðlæg eða breytileg átt 5-13 í öðrum landshlutum og skúrir eða él, en þurrt að mestu norðaustanlands. Frost 0 til 6 stig fyrir norðan, en hiti að 5 stigum sunnanlands. Norðaustan hvassviðri eða stormur og éljagangur um landið norðanvert eftir hádegi á morgun, en hægari breytileg átt og dálítil él sunnantil og kólnar lítið eitt.

Á þriðjudag:

Norðaustan stormur og snjókoma um landið norðvestanvert, en norðaustan hvassviðri og él norðaustantil þegar líður á daginn. Annars hægari suðvestlæg eða breytileg átt með dálitlum skúrum eða éljum. Vægt frost, en hiti að 4 stigum við suðurströndina.

Á miðvikudag:

Norðaustan 8-15 og él, en dregur úr vindi og éljum þegar líður á daginn. Hiti breytist lítið.

Á fimmtudag:

Fremur hæg breytileg átt. Él á stöku stað, en annars bjart að mestu. Þykknar upp sunnan- og vestanlands um kvöldið. Kalt í veðri.