Tólf af ní­tján smituðum voru utan sótt­kvíar

Nítján greindust með kórónuveiruna innanlands í gær. Tólf þeirra voru ekki í sóttkví við greiningu. Ekki hafa fleiri greinst með veiruna á einum sólarhring síðan 9. apríl, þegar 27 greindust. 

Þetta kemur fram í uppfærðum tölum á vefnum covid.is. Tölurnar ríma við orð Thors Aspelund prófessors sem hann lét falla í Morgunútvarpinu á Rás 2 í morgun, þar sem hann sagði nítján hafa greinst í gær.

Fjögur smit greindust á landamærum, en þar er beðið niðurstöðu mótefnamælingar í tilvikum þriggja. Einn mældist með mótefni. Einn er nú á sjúkrahúsi vegna veirunnar.

Alls voru tekin 578 einkennasýni hjá sýkla- og veirufræðideild Landspítalans og Íslenskri erfðagreiningu í gær og 793 sýni á landamærunum eða í seinni landamæraskimun. Þá voru 646 sýni tekin í annarri skimun hjá Íslenskri erfðagreiningu.

84 manns eru nú í einangrun, samanborið við 75 í gær. Þá eru 546 í sóttkví, en þeir voru 437 í gær.

Nýgengi innanlandssmita heldur áfram að þokast upp á við. Nú hafa 17,7 manns á hverja 100.000 íbúa greinst smitaðir undanfarna fjórtán daga, en talan var 13,6 í gær. Á sama tíma er nýgengi landamærasmita nú 4,4, en var 4,1 í gær.

Nú hafa 2.206 manns greinst smitaðir af kórónuveiru frá upphafi faraldursins. Tíu þeirra sem hafa veikst af Covid-19 eru látnir.

Upplýsingafundur Embættis landlæknis og almannavarnadeildar ríkislögreglustjóra er á dagskrá í dag klukkan 14 og verður í beinni útsendingu á Vísi klukkan 14.