Fólki í sótt­kví fjölgar um nærri 1.200 milli daga

Alls eru nú 3571 manns í sóttkví og hefur þeim fjölgað um nærri 1.200 milli daga. Fimmtán manns á sjúkrahúsi vegna Covid-19, þar af eru fjórir á gjörgæslu.

Líkt og fram kom í morgun greindust 99 með kórónuveiruna innanlands í gær. 59 þeirra sem greindust voru í sóttkví, en fjörutíu ekki.

Þetta kemur fram í uppfærðum tölum á vefnum covid.is. Eitt smit greindist á landamærum þar sem niðurstöðu mótefnamælingar er beðið.

747 manns eru nú í einangrun, samanborið við 670 í gær. Þá eru 3.571 í sóttkví í dag, samanborið við 2.391 í gær.

Af þeim 99 sem greindust innanlands í gær greindust 85 eftir að tekin voru svokölluð einkennasýni og þrettán við sóttkvíar- og handahófsskimun. Þá greindist einn í annarri skimun hjá Íslenskri erfðagreiningu.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 173,2 en var 156,3 í gær. Þá er nýgengi landamærasmita nú 6,8, en var 7,1 í gær.

Nú hafa 3.081 manns greinst smitaðir af kórónuveiru á Íslandi frá upphafi faraldursins. Tíu þeirra sem hafa veikst af Covid-19 eru látnir.

Alls voru tekin 1763 einkennasýni hjá sýkla- og veirufræðideild Landspítalans og Íslenskri erfðagreiningu í gær og 692 sýni á landamærunum eða í seinni landamæraskimun. Þá voru 263 sýni tekin við sóttkvíar- og handahófsskimun og 509 í annarri skimun hjá Íslenskri erfðagreiningu.