Meðvirkni í stjórnun - Á mannauðsmáli með Sigríði Indriðadóttur

Unnur Helgadóttir ræðir við Sigríði Indriðadóttur, mannauðsstjóra Póstsins, í hlaðvarpsþættinum Á mannauðsmáli. Umræðuefni þáttarins er meðvirkni í stjórnun og á vinnustöðum. Sigríður segir miklu máli skipta að vera hugrökk þegar tekið er á meðvirkni og að ábyrgðinni sé varpað á réttan stað. Taka á málunum á faglegan hátt og koma í veg fyrir svokallaða botnhegðun. Hlusta má má á þáttinn í spilaranum hér fyrir neðan.

Í störfum sínum í mannauðsmálum hefur Sigríður tekist á við miklar áskoranir. Meðal annars hafði hún fjóra borgarstjóra á einu ári sem hún starfaði sem mannauðsráðgjafi hjá Reykjavíkurborg

Sigríður hóf störf hjá Póstinum árið 2018 og segir fyrirtækið í dag vera gjörólíkt því sem hún hóf störf hjá fyrir rúmum tveimur árum. Með nýjum forstjóra hafi breytingar átt sér stað í fyrirtækinu og miklar áskoranir fyrir mannauðsdeild fyrirtækisins.

Sigríður fer yfir það í þættinum hvernig hún öðlaðist hugrekki til þess að taka á meðvirkni. Hún er gjarnan kölluð til með fyrirlestra um málefnið og talar þá um styrkleika og skuggahliðar, botnhegðun og topphegðun og hvernig okkur hættir til að samþykkja hegðun sem allir vita að er ekki í lagi. Í þættinum kemur Sigríður inn á hugrekkið sem þær konur sýndu sem ýttu Metoo byltingunni af stað og margt fleira. Afar áhugaverður þáttur sem hlusta má á hér á Vísi og á blogginu á Alfreð.is