Efni úr endurunnum plastflöskum notað í úlpur 66° Norður

“Við vitum að úlpur frá okkur ganga oft mann frá manni og eru notaðar í fjölda ára. Það er okkar innblástur við hönnunina.” Þetta segir Sæunn Þórðardóttir fatahönnuður hjá 66° Norður í viðtali við Vísi.

Sæunn hefur starfað sem fatahönnuður hjá 66° Norður frá árinu 2011 og komið að hönnun og þróun fjölmargra vörulína fyrirtækisins á þeim tíma.

Úlpa framleidd úr endurunnum plastflöskum

Ein vinsælasta yfirhöfn merkisins í fyrra var vafalaust úlpan Dyngja og mátti sjá unga sem aldna skarta úlpunni síðasta vetur.

“Það er virkilega ánægjulegt að geta núna boðið upp á Dyngju dúnúlpurnar úr nýju endurunnu efni,” segir Sæunn en ný umhverfisvænni útgáfa af Dyngju kom í búðir í haust. 

Síðan 66° Norður var stofnað árið 1926, segir Sæunn það hafa verið rauðan þráð í starfseminni að framleiða endingargóðar flíkur.

“Það er hluti af framleiðslunni hjá okkur að vera stöðugt í leit að umhverfisvænni og sjálfbærari efnum. Efnum sem eyðast í náttúrunni eða efnum sem gerð eru úr endurunnum efnum eins og plasti. Ytra byrði nýju útgáfunnar af Dyngju er sem dæmi pólýester sem unnið er úr plastflöskum.” 

Mikil áhersla er lögð á val á hráefnum í framleiðsluna að Sæunnar sögn og miklar kröfur gerðar um að gæði. Lykilatriði segir Sæunn að notagildi og ending fari þar saman.

“Við notum endurunnin, uppunnin, lífbrjótanleg eða lífræn náttúruleg efni þegar kostur er á. En það þarf að hugsa vel út í það að allir þessir þættir fari saman. Í okkar augum er einnig stór þáttur í sjálfbærni að framleiða vöru sem endist og nýtist til lengri tíma.”

Fyrirtækið hefur frá stofnun rekið eigin verkmiðjur og saumaverkstæði þar sem við tökum á móti öllum okkar vörum og gerum við þær ef á þarf að halda. Sjálfbærni og að nýta allt til fullnustu hefur því í raun alltaf verið lykilþáttur í okkar nálgun og starfsemi.

Eitt fyrsta fatafyrirtækið sem notaði efni úr endurunnu plasti í fatnað sinn er bandaríska útivistarmerkið Patagonia en fyrirtækið hefur alla tíð verið leiðandi í umhverfisstefnu í fataiðnaðinum. Ein frægasta auglýsingaherferð Patagonia er tvímælalaust þegar þau notuðu slagorðið EKKI KAUPA ÞENNAN JAKKA (Don't buy this jacked)  yfir mynd af nýjum jakka merkisins. 

Með þessu sögðu talsmenn Patagonia að þau væru með þessu að reyna að hvetja neytendur til umhugsunar um kauphegðun sína. Kaupa frekar flíkur sem endast lengur og fylgja ekki öllum tískubylgjum. Herferðin var umdeild en hafði óneitanlega áhrif á viðhorf fólks til fataauglýsinga. 

Fatamerki víðs vegar um heim, bæði tískumerki og útivistarmerki, einbeita sér nú í meira mæli að notkun sjálfbærari efna og umhverfisvænni framleiðslu.  Sem dæmi um merki má nefna hátískumerkin Stella McCartney, Pada og Gucci og útivistarmerkin Fjallraven og Houdini. 

Endurunnið sjávarplast notað í efnaframleiðslu

Sæunn segir að í framleiðsluferli 66°Norður leiti þau markvisst uppi efnaframleiðendur sem eru framarlega í nýsköpun og að þeir leggi áherslu á þróun sjálfbærari efna.

Þeir efnaframleiðendur sem við vinnum með sérhæfa sig í tæknilegum efnum þar sem endurunnið plast er mikið notað. Við erum til að mynda að nota efni sem unnin eru úr endurunnu sjávarplasti. Við leggjum mikla áherslu á að nota slík efni enda er mikilvægt að fullnýta þau gerviefni þarna úti sem þegar hafa verið framleidd.

Með breyttum tímum og vitundarvakningu fólks í umhverfismálum segir Sæunn að þau finni fyrir aukinni eftirspurn eftir fatnaði sem framleiddur sé á umhverfisvænan hátt.

“Eftirspurnin er auðvitað mikil en þetta er líka það sem við sjálf teljum réttast að gera. Það er líka umhverfisvænt að kaupa sér flíkur sem endast og virka vel í íslenskum aðstæðum. Það að kaupa sér flík sem endist í mörg ár er til dæmis miklu vistvænna en að kaupa sér nýja flík á hverju ári.”

Úlpur sem ganga í erfðir

Að nýta efni sem verður afgangs við framleiðslu segir hún mikilvægan þátt í umhverfisvænni stefnu fataframleiðenda.

“Við leggjum mikla áherslu á að nýta afgangsefni og höfum gert í mörg ár. Vík hanskarnir eru gott dæmi um vöru hjá okkur sem er framleidd úr afgangsefnum en þeir hafa verið í línunni í 15 ár.”

Við vitum að úlpur frá okkur ganga oft mann frá manni og eru notaðar í fjölda ára. Það er okkar innblástur við hönnunina. Þetta eru flíkur sem ættu að geta gengið í erfðir.

Það er í mörg horn að líta þegar hugsa á út í hvað er umhverfisvænt og hvað ekki og getur framleiðsluferlið því verið mjög flókið. Sæunn segir meðal annars litarefni í flíkum vera eitt af því sem fólk átti sig kannski ekki á að geti mengað.

“Stefnan er alltaf á að framleiða allan fatnað á sem umhverfisvænastan hátt og nýta endurunnin efni enn frekar eins og hægt er. Einnig er orðið meira um efni sem eru lituð með náttúrulegum litum og þurfa lítið af vatni við litunina en þetta allt skiptir máli.”

Umhverfismeðvitund neytenda hvatning

Sæunn segir fyrirtækið nú þegar vera með hátt hlutfall endurunna efni í framleiðslu sinni og sem dæmi er öll örtrefjaeinangrun fatnaðar þeirra að langmestum hluta úr endurunnum efnum eða 80% þess.

“Núna erum við byrjuð að nota efni sem eru svokölluð no-micro efni. Kosturinn við það efni er sá að efnisagnir leysast ekki úr flíkinni í þvotti og þaðan út í umhverfið.”

Finnið þið fyrir breyttum áherslum í kauphegðun neytendenda síðustu ár?

Já, neytendur eru orðnir miklu meðvitaðri um umhverfið sitt og liður í því er að ganga í umhverfisvænni flíkum. Við lítum svo á að það er alltaf hægt að gera betur í framleiðslunni og er því aukin umhverfismeðvitund neytenda okkur mikil hvatning.

“Framleiðsluferlið okkar byggir á hringrásarkerfi og er nú aðgengilegt á nýrri vefsíðu okkar. Við viljum koma þessum upplýsingum meira á framfæri þannig að neytendur séu meðvitaðri um framleiðsluna á flíkum okkar og hvað við erum að gera í umhverfismálum almennt,” segir Sæunn að lokum.