Mörg vandamál Bandaríkjanna í faraldrinum megi rekja til Trump

Það var ekki skortur á nauðsynlegum tækjabúnaði sem stóð Bandaríkjamönnum fyrir þrifum í baráttunni við kórónuveiruna, að mati forstjóra Íslenskrar erfðagreiningar. Þvert á móti búi Bandaríkin að birgðum sem önnur ríki, Ísland þar á meðal, hafa getað sótt í vegna faraldursins. Samræmingu aðgerða hafi hins vegar verið ábótavant í Bandaríkjunum og þar leiki Bandaríkjaforseti lykilhlutverk.

Áhersla Íslendinga á víðtæka skimun, smitrakningu, sóttkví og einangrun hefur verið tíður fréttamatur í útlenskum miðlum á síðustu vikum. Aðferðafræðin þykir hafa gefið góða raun; virkum smitum fækkar dag frá degi, dánartíðnin lág og samfélagslegt smit innan við eitt prósent, ef marka má gögn úr skimun Íslenskrar erfðagreiningar.

Niðurstöðurnar hafa vakið heimsathygli og hefur Kári Stefánsson, forstjóri ÍE, setið fyrir svörum í mörgum af stærstu miðlum heims - rétt eins og þau sem hafa farið fyrir aðgerðum Íslendinga.

Í viðtali við bandarísku fréttaveituna Bloomberg ítekrar Kári það sem hann sagði við CNBC í liðinni viku: Bandaríkin ættu vel að geta fylgt aðferðafræði Íslendinga, hún hafi meira að segja orðið til í Bandaríkjunum.

Hvergi í heiminum megi ganga að jafn ríkulega útbúnum háskólum eins og vestanhafs að sögn Kára, stofnanir sem gætu aðstoðað við skimun og greiningu fengju þær kallið. Ashlee Vance, þáttastjórnandi Bloomberg, segir háskólana viljuga til að taka þátt í baráttunni en spyr hvað standi því fyrir þrifum, skortir skólana prófefni?

„Ég kaupi mín prófefni frá Bandaríkjunum,“ segir Kári og glottir. Þau skorti ekki, aftur á móti skorti „algjörlega samhæfingu“ í aðgerðunum vestanhafs. „Það virðist vera fullkomin vangeta til að nýta sér þá staðreynd að í faraldri sem þessum vilja allir leggja sitt af mörkum,“ segir Kári.

Því næst vísar hann til frægra ummæla Michaels Dukakis, ríkisstjóra Massachusetts og forsetaframbjóðandi Demókrataflokksins, þegar hann gagnrýndi ríkisstjórn Ronalds Reagan árið 1988:

„Gamalt grískt máltæki segir: Fiskur rotnar fyrst frá hausnum. Þetta byrjar á toppnum.“

Kári gerir þessi orð að sínum í viðtalinu við Bloomberg og bætti við: „Ég tel að mörg vandamála ykkar megi rekja til yfirhershöfðingjans (e. Commander in chief),“ og vísar þar til Bandaríkjaforseta.

Donald Trump hefur ekki aðeins sætt gagnrýni frá Kára Stefánssyni á síðustu vikum. Ríkisstjórn hans hefur verið gagnrýnd fyrir að bregðast seint og illa við faraldrinum. Þannig liðu tveir mánuðir frá því að Bandaríkjastjórn fékk fyrstu upplýsingarnar um kórónuveirufaraldurinn í Kína þar til alríkisstjórnin greip til aðgerða.

Þá hefur Bandaríkjaforseti hvatt fólk til að mótmæla samkomu- og útgöngubönnum hinna ýmsu ríkja vestanhafs, við mismikla hrifningu. Tilfellum kórónuveirunnar í Kentucky fjölgaði þannig skarpt tveimur dögum eftir að mótmælendur söfnuðust þar saman um helgina.

Hvergi í heiminum hafa verið staðfest fleiri smit en í Bandaríkjunum. Þau eru næstum 900 þúsund talsins vestanhafs sem hafa degið rúmlega 50 þúsund Bandaríkjamenn til dauða.