Fimm greindust innan­lands

Þetta kemur fram í uppfærðum tölum á síðunni covid.is. Alls eru nítján nú á sjúkrahúsi vegna Covid-19 og enginn á gjörgæslu.

Sjö greindust smitaðir á landamærum í gær – tveir með virkt smit í seinni skimun og er niðurstöðu mótefnamælingar beðið í tilvikum fimm.

160 manns eru nú í einangrun, samanborið við 169 í gær. Þá eru 229 í sóttkví í dag, samanborið við 228 í gær. 1.464 eru nú í skimunarsóttkví, en voru 1.853 í gær.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 18,5, en var 18,0. Nýgengi landamærasmita er nú 29,5, en var 28,1 í gær.

Alls hafa 5.956 manns greinst með kórónuveiruna hér á landi frá því faraldurinn hófst í lok febrúar. Þá hafa 29 dauðsföll verið rakin til Covid-19 á Íslandi frá upphafi faraldursins.

Alls voru tekin 823 einkennasýni hjá sýkla- og veirufræðideild Landspítalans og Íslenskri erfðagreiningu í gær og 712 sýni á landamærunum eða í seinni landamæraskimun. Þá voru tekin níu sýni í annarri skimun hjá Íslenskri erfðagreiningu.

Fréttin hefur verið uppfærð.