Snjóflóð féll fyrir ofan veginn um Eyrarhlíð

Frá þessu er greint í færslu á Facebook-síðu lögreglunnar á Vestfjörðum. Þar segir að veginum hafi ekki verið lokað en Veðurstofa Íslands sé að meta aðstæður og stöðuna almennt varðandi snjóflóðahættu. Nánari upplýsingar verði veittar þegar málin skýrast frekar.

Þá hvetur lögreglan vegfarendur til þess að fylgjast vel með upplýsingum á vef Vegagerðarinnar um veður og færð á vegum eða þá að hringja í upplýsingasímann 1777.

Gul veðurviðvörun er nú í gildi á Ströndum, Norður- og Austurlandi vegna norðanhríðar. Þá er óvissustig á Norðurlandi vegna snjóflóðahættu og hættustig í gildi á Siglufirði að því er fram kemur á vef Veðurstofunnar.