Andrea Mist til liðs við Ís­lands­meistara Breiða­bliks

Hin 22 ára gamla Andrea Mist skrifaði í kvöld undir lánssamning við Breiðablik og mun leika með Íslandsmeisturunum næsta sumar. Breiðablik verður hennar þriðja lið hér á landi en hún er uppalin hjá Þór/KA á Akureyri. Þaðan fór hún til FH og nú á láni til Breiðabliks.

Veturinn 2019 lék Andrea Mist með austurríska liðinu FFC Vorderland og í janúar á síðasta ári gekk hún til liðs Oribicia Calcio í ítölsku úrvalsdeildinni. Vegna kórónufaraldursins kom hún heim og samdi við FH þar sem hún spilaði síðasta sumar. Alls skoraði hún fimm mörk í 13 leikjum fyrir FH síðasta sumar er liðið féll niður í Lengjudeildina.

Alls hefur Andrea leikið 121 deild- og bikarleik hér á landi og skorað 22 mörk. Þá hefur hún leikið þrjá leiki með A-landsliði Íslands ásamt alls 30 leikjum fyrir yngri landsliðin.