Stóðu við stóru orðin og fengu sér allar Hamarshúðflúr

Þrír leikmenn í kvennaliði Hamars stóðu við stóru orðin og fengu sér húðflúr í tilefni af árangri liðsins í 2. deildinni síðasta sumar.

„Nú er komið að skuldadögum. Í byrjun síðasta sumars þá kom spá þar sem okkur var spáð níunda sæti í deildinni. Ég gubbaði út úr mér að ég myndi fá mér Hamars tattú ef við myndum lenda í sjötta sæti eða hærra. Þær tvær sögðu: Við líka,“ sagði Dagný Rún Gísladóttir, fyrirliði Hamars, á Instagram síðu Hamarskvenna.

Hinir leikmennirnir eru þær Hrefna Ósk Jónsdóttir og Elín Hrönn Jónsdóttir en allar eru stelpurnar á 24. aldursári.

Þær tróðu hinum fræga sokk upp í spámennina með því að ná þessu sjötta sæti á sínu fyrsta tímabili hjá kvennaliði félagsins frá upphafi.

Hamarsliðið vann fjóra leiki, gerði tvö jafntefli og skoraði tuttugu mörk á tímabilinu. Liðið skoraði fleiri mörk en Hamrarnir sem voru í næsta sæti fyrir ofan þær en fengu fjórum stigum færra.

Stelpurnar leyfðu líka fylgjendum Instagram síðu sinnar að fylgjast með því þegar þær fengu sér þessi Hamarshúðflúr.

Þær þekkjast nú á upphandleggnum eins og sjá má betur hér fyrir neðan.