Algjör samstaða meðal liða í Pepsi Max karla í knattspyrnu að taka upp úrslitakeppni

Óskar Ófeigur Jónsson skrifar 25. mars 2021 14:40

Valsmenn eru Íslandsmeistarar í knattspyrnu en deildin í fyrra kláraðist þó án þess að allar 22 umferðirnar voru spilaðar. Vísir/Bára

Félögin í efstu deild karla hafa sent frá sér sameiginlega yfirlýsingu um framtíðarfyrirkomulag á Pepsi Max deildinni.

Tillaga um að fjölga leikjum í úrvalsdeild karla var felld á síðasta ársþingi KSÍ, hvorki var samþykkt að fjölga liðum í fjórtán úr tólf eða að taka upp tillögu stjórnar KSÍ um að vera með úrslitakeppni í efri og neðri hluta deildarinnar.

Félögin í efstu deild hafa nú fundað um málið og sendu í dag frá sér yfirlýsing um samstöðu félaga í efstu deild karla í knattspyrnu.

Þar kemur fram að niðurstaðan úr viðræðunum er algjör samstaða um að láta breytt fyrirkomulag verða að veruleika að minnsta kosti tímabundið.

Félögin vilja taka upp breytingatillögu frá stjórn KSÍ um að taka upp fimm leikja úrslitakeppni eftir að 22 umferðum er lokið í deildinni. Þar fara sex lið í efri hluta og sex lið í neðri hluta.

Yfirlýsinguna má sjá hér fyrir neðan.

Yfirlýsing um samstöðu félaga í efstu deild karla í knattspyrnu.

Í ljósi umræðu í knattspyrnuhreyfingunni um stækkun Íslandsmóts efstu deildar karla í kjölfar Ársþings KSÍ vilja félög efstu deildar koma eftirfarandi á framfæri:
Á 75. Ársþingi KSÍ var lögð fram tillaga starfshóps um keppnisfyrirkomulag efstu deildar karla.
Fól það fyrirkomulag í sér 12 liða deild þar sem leikið er heima og að heiman líkt og nú er ásamt úrslitakeppni. Í úrslitakeppninni myndi efri hluti deildarinnar leika hvert við annað og sama fyrirkomulag í neðri hluta deildarinnar. Með þessu móti skapast mikil keppni allt frá neðri hluta deildarinnar upp í titil- og evrópubaráttu. Öll lið munu kappkosta að vera í efri hluta deildarinnar áður en úrslitakeppni hefst.
Úrslitakeppni mótsins er form með hæfilegri fjölgun leikja sem gefur ýmis markaðsleg tækifæri m.a. í sölu sjónvarps-og markaðsréttinda.
Markmiðið með fyrirhuguðum breytingum eru til þess fallið að ná viðspyrnu á stöðu deidarinnar í alþjóðlegum samanburði þegar horft er til styrkleikalista UEFA og að auka gæði og samkeppnishæfni íslenskrar knattspyrnu og leikmanna sem leika á Íslandi.
Forráðamenn félaga í efstu deild karla hafa fundað um þetta málefni og niðurstaðan er algjör samstaða um að láta breytt fyrirkomulag verða að veruleika a.m.k. tímabundið.
Með undirritun þessarar yfirlýsingar lýsa formenn stjórna viðkomandi félaga efstu deildar yfir stuðningi við áðurnefnda tillögu og heita því að styðja nauðsynlega breytingu á lögum KSÍ á næsta ársþingi KSÍ 2022 með það fyrir augum að keppnisfyrirkomulagið taki gildi sama ár.

Pepsi Max-deild karla

Mest lesið

Fleiri fréttir