Tíu greindust innanlands í gær

Þetta kemur fram í uppfærðum tölum á Covid.is. 109 eru nú í einangrun, samanborið við 108 í gær. 972 eru nú í sóttkví, en voru 1.375 í gær. 1.698 eru nú í skimunarsóttkví. Þá er einn á sjúkrahúsi vegna Covid-19.

Átta greindust á landamærunum í gær – einn með virkt smit í fyrri skimun, fjórir mældust með mótefni og er niðurstöðu mótefnamælingar beðið í tilviki þriggja.

Nýgengi á smiti innanlands, þ.e. fjöldi smitaðra á hverja 100 þúsund íbúa undanfarnar tvær vikur, er nú 16,9, en var 14,5 í gær. Nýgengi á smiti á landamærum er nú 11,5, en var 12,0 í gær.

20.734 eru nú fullbólusettir hér á landi og er bólusetning hafin hjá 24.688 til viðbótar.

6.194 manns hafa nú greinst með kórónuveiruna hér á landi frá því faraldurinn hófst í lok febrúar á síðasta ári. Þá hafa 29 dauðsföll verið rakin til Covid-19 á Íslandi frá upphafi faraldursins.

Alls voru tekin 1.657 einkennasýni hjá sýkla- og veirufræðideild Landspítalans og Íslenskri erfðagreiningu í gær. Þá voru 493 sýni tekin á landamærunum eða í seinni landamæraskimun og 571 í svokallaðri sóttkvíar- og handahófsskimun. Þá voru tekin 224 sýni í annarri skimun hjá Íslenskri erfðagreiningu.

Samkvæmt upplýsingum frá skólastjóra Laugalækjarskóla greindist enginn nemandi með kórónuveirunna, en allir nemendur skólans fóru í sýnatöku í gær eftir að nemandi hafði greinst með smit fyrir helgi.

Fréttin hefur verið uppfærð.