Sjáðu upphitunarmyndband fyrir oddaleikjakvöldið mikla

Klukkan 18:15 hefst leikur Stjörnunnar og Grindavíkur í Garðabænum og klukkan 20:15 er komið að leik Vals og KR á Hlíðarenda. 

Báðir leikirnir verða sýndir beint á Stöð 2 Sport. Upphitun Kjartans Atla Kjartanssonar og félaga hefst klukkan 17:45 og stendur langt fram á kvöld.

Til að koma sér í rétta gírinn fyrir kvöldið er tilvalið að horfa á upphitunarmynd sem Egill Birgisson gerði fyrir oddaleikina tvo. Myndbandið má sjá í spilaranum hér fyrir neðan.

Einvígin eru ólík að því leyti að hjá Stjörnunni og Grindavík hafa allir leikirnir unnist á heimavelli á leikir Vals og KR hafa bara unnist á útivelli.

Rimma Vals og KR hefur vakið sérstaklega mikla athygli enda eru tengslin milli liðanna mikil og grunnt á því góða milli þeirra.

Stjarnan og Grindavík hafa einnig marga hildina háð í gegnum tíðina. Þau mættust meðal annars í úrslitum um Íslandsmeistaratitilinn 2012 og 2013 og í bikarúrslitum 2013 og 2020.

Upp úr sauð í stúkunni í fjórða leiknum í Grindavík á miðvikudaginn þar sem menn létu hnefana tala.

Keflavík og Þór Þ. eru þegar búin að tryggja sér sæti í undanúrslitunum sem hefjast á mánudaginn.

Domino's-deildirnar í körfubolta eru á Stöð 2 Sport en upplýsingar um útsendingar má finna hér. Domino's-deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.