Hjálpar einstaklingum að skapa vináttu í gegnum tölvuleiki

Í nýju viðtali í hlaðvarpinu 24/7 talar Tryggvi meðal annars um mögulegan ávinning tölvuleikjanotkunar.

„Tölvuleikir eru jafn misjafnir og þeir eru margir. Núna er ég þriggja barna faðir og það er fullt af tölvuleikjum sem ég vil alls ekki að börnin mín spili og helst aldrei nokkurn tíman. Stór hluti af þeim tölvuleikjum í símum vinna á ákveðnu fárhættuspilamódeli sem er sérstaklega hannað til að keyra upp dópamínframleiðslu í heilanum, eftirvæntingahormónið sem fær þig að vera spenntur til að fá eitthvað,“ útskýrir Tryggvi.

„Börn eiga ekki að vera í þessu ung og margir fullorðnir ströggla með þetta. Svo ertu á móti með aðra leiki eins og Minecraft sem getur verið algjörlega frábært verkefni fyrir stráka og stúlkur til að vinna saman og gera eitthvað skapandi. Smíða nýjan heim.“

Hann segir að þetta geti ýtt undir sköpunarkraft krakka.

„Hitt er síðan hvernig þú spilar tölvuleiki. Ertu að spila þá einn út í horni og einangra þig eða ertu að hitta vini þína á kvöldin að byggja eitthvað upp saman og þið eruð kannski að tala saman.“

Halldór heldur sambandi við gamla vinahópinn sinn vegna þess að þeir spila saman tölvuleiki reglulega á kvöldin.

„Þá er verið að spyrja hey hvað er að frétta dóttir þinni og hey varstu ekki að fá stöðuhækkun. Sem ég tel að sé mjög jákvæð iðja. Við gætum ekki haldið þessum vinahóp gangandi svona vel í gegnum flesta aðra miðla. Þetta er allt spurning um notkunina og gæði vörunnar sem þú ert að nota.“

Staða drengja á Íslandi slæm og að versna

„Ég fór að skoða stöðu drengja og hún er slæm því miður. Það er víða á Íslandi sem er hægt að snerta niður þar sem staða drengja er slæm og að versna. 34,4 prósent drengja í dag útskrifast úr grunnskóla án þess að geta lesið sér til gagns,“ segir Tryggvi.

„Strax í fjórða bekk eru drengir með talsvert lélegri einkunnir en stelpur en strax í sjöunda bekk og tíunda bekk hafa stelpurnar bætt sig á meðan einkunnir drengja lækka. Íslenskir drengir eiga norðurlandamet í sjálfsvígum 10 til 19 ára, við eigum Evrópumet í klámhorfi. Við erum með eitt hæsta brottfall úr framhaldsskólum. Við erum með eitt lægsta skráningarhlutfall OECD landa í háskóla. Það er núna gríðarleg aukning í ungum körlum á leiðinni á örorku. Karlkyns fyrirmyndum í námi fækkar mjög hratt, 17,5 prósent kennara í grunnskólum eru karlmenn.“

Hann bendir á að þeim hefur fækkað stöðugt í 22 ár í röð.

„Ég vildi að ég gæti sagt að hér stoppar það en það eru fleiri og fleiri gagnauppsprettur sem sína fram á frekar dapurlega mynd og hún er að versna rosalega hratt.“

Tryggvi segir að þetta sé ekki beint falinn vandi en það vanti samt að það sé farið af krafti í umræðuna. Viðtalið má heyra í heild sinni í spilaranum hér fyrir neðan. 

Í hlaðvarpinu 24/7 með Begga Ólafs talar Tryggvi um ýmislegt tengt tölvuleikjum. Tryggvi starfar sem greinandi hjá CCP og formaður Hugverkaráðs. Tryggvi og Háskóli Íslands byrjuðu nýverið með námskeið til að hjálpa einstaklingum að mynda mannleg tengsl í gegnum tölvuleiki. Í þættinum ræðir Tryggvi um ávinninga tölvuleikjanotkunar, að manneskjan sé slæm, takmörk fastmótaðra hugmyndafræða, sjálfsaga, auðmýkt, trú og margt fleira.