Fékk skilaboð frá nauðgara sínum sem stendur nú frammi fyrir handtöku

Shannon Keeler steig fram í viðtali við AP fréttaveituna fyrr á árinu og sagði meðal annars frá nauðguninni og skilaboðunum sem nauðgari hennar sendi henni í fyrra. Árið 2003 var Keeler átján ára gömul í háskóla. Hún var í samkvæmi en Ian Cleary er sakaður um að hafa elt hana heim og nauðgað henni.

Hún fór á sjúkrahús og fékk áverkavottorð og leitaði einnig til lögreglu. Henni var sagt að erfitt væri að sækja mál þar sem fórnarlömb nauðgunar hefðu verið við drykkju. Þá týndist áverkavottorð hennar.

Keeler útskrifaðist svo þremur árum seinna en Cleary var aldrei ákærður.

Í fyrra rakst hún svo á óskoðuð skilaboð sem hún hafði fengið hálfu ári áður sem voru frá Cleary. Þar sagði hann: „Svo ég nauðgaði þér.“ Hann skrifaði einnig að hann myndi aldrei nauðga annarri manneskju og að hann þyrfti að heyra rödd hennar. Þá sagðist Cleary ætla að biðja fyrir Keeler.

Þessi skilaboð tók Keeler til lögreglunnar og fór hún fram á að málið gegn Cleary yrði opnað á nýjan leik. Það virðist hafa borið árangur en eins og áður segir hefur verið gefin út handtökuskipun gegn Cleary.

Í nýrri frétt AP segir að lögregluþjónum hafi tekist að tengja aðganginn sem sendi skilaboðin við Cleary.

Háskólinn sem þau Keeler og Cleary sóttu kallast Gettysburg College og þykir tiltölulega lítill en þar hafa nemendur verið um 2.500 talsins. Á árunum 2013 til 2019 voru 95 nauðganir tilkynntar til forsvarsmanna skólans en á sama tímabili var einungis ákært í tíu nauðgunarmálum í umræddri sýslu, samkvæmt greiningu AP.