Ólafur: Ég er mjög pirraður

„Já, ég er mjög pirraður. Í sjálfu sér áttum við mjög góðan leik og eins og þú segir fengum fullt af góðum færum og ég hefði viljað nýta eitthvað af þeim. Svo finnst mér við hefðum átt að fá víti en heilt yfir góður leikur en tvö töpuð stig,“ sagði Ólafur.

Þrátt fyrir mörg góð færi sem Fylkir fengu í kvöld þá tókst þeim ekki að skora. Arnór Borg til að mynda klúðraði frákasti í lokin gegn opnu marki. Ólafur telur að þetta gæti verið sálrænt.

„Það gæti verið sálrænt eða ekki. Þegar fyrsta markið kemur þá opnast of einhverjar flóðgáttir,“ sagði Ólafur um færanýtingu sinna mann í kvöld.

Fylkir höfðu fyrir leikinn í kvöld tapað tveimur leikjum í röð í deildinni. Ólafur sá mikið batamerki á sínu liði.

„Mér fannst við aggressívir, vorum mjög grimmir og hlupum vel allan leikinn. Allt annað að sjá okkur en í síðustu tveimur leikjum svo við erum mjög ánægðir heilt yfir fyrir utan stigin,“ sagði Ólafur.

Ragnar Sigurðsson sem leikið hefur 97 landsleiki er kominn til Fylkis og var á bekknum í fyrsta sinn í kvöld. Hann er ekki klár að mati þjálfaranna og mun koma hægt og rólega inn í liðið. Hann hafi þó gríðarlega góð áhrif á liðið.

„Hann kemur hægt og rólega inn í þetta, hann kemur á bekkinn og við höldum hreinu í fyrsta skiptið í langan tíma svo það hefur líklega einhver áhrif á strákana. Hann setur allt upp á annað level, maður með þessa reynslu og þessa getu. Kemur miklu meiri talandi inn á æfingar og menn eru miklu meira tilbúnir, vakandi og meiri fókus. Vonandi á hann eftir að nýtast okkur vel það sem eftir er,“ sagði Ólafur að lokum um Ragnar.