Lennon í tvö ár til viðbótar hjá FH

Samningur FH og Lennon er nú út 2023 tímabilið en hann hefur spilað með Hafnarfjarðarliðinu frá árinu 2014.

Sumarið 2023 yrði þá hans tíunda tímabil með FH-ingum en Lennon er 33 ára gamall.

Lennon kom fyrst til Íslands árið 2011 en spilaði til að byrja með hjá Fram. Hann hefur skorað 8 mörk í 13 leikjum með FH í Pepsi Max deildinni í sumar og er alls kominn með 96 mörk í 178 leikjum í efstu deild á Íslandi.

Lennon fær tækifæri til að halda upp á nýja samninginn í kvöld þegar FH tekur á móti HK. Hann hefur skorað fjögur mörk í síðustu tveimur leikjum og skoraði í fyrri leik liðanna í Kórnum.