Ræddu rauða spjaldið hjá Jóa Kalla í gær: „Ég held að hann sé alveg að segja satt“

Jóhannes Karl fékk rautt spjald frá Helga Mikael Jónassyni dómara á 26. mínútu leiksins fyrir að mótmæla því að aðstoðardómarinn dæmdi boltann ekki inni þegar skot Gísla Laxdal Unnarssonar fór í slána og að því virtist inn fyrir marklínuna.

Staðan var orðin 1-0 fyrir ÍA en spennustigið var hátt enda urðu Skagamenn að vinna þennan leik ætli þeir að halda sæti sínu í deildinni.

Skagamenn sáu boltann inni og voru mjög ósáttir. Jóhannes Karl sjálfur hljóp alla hliðarlínuna til að segja sína skoðun við aðstoðardómarann Bryngeir Valdimarsson. Helgi Mikael kom þá að og gaf Jóhannesi Karli rauða spjaldið fyrir mótmælin.

„Svo var þetta rauða spjald sem Jóhannes Karl fékk. Hann er þarna kominn ansi langt út úr boðvanginum, hvort sem hann var að fagna marki eða ekki,“ sagði Kjartan Atli Kjartansson, umsjónarmaður Pepsi Max Stúkunnar í gær.

„Ég held að hann sé alveg að segja satt með það að hann hafi ekki sagt neitt dónalegt. Viðbrögðin hjá Helga Mikael þegar hann gefur honum rauða spjaldið. Hann er bara segja: Þetta er bara reglan, ég á að reka þig út af af því að þú fórst of langt út úr boðvanginum,“ sagði Baldur Sigurðsson, sérfræðingur Pepsi Max Stúkunnar.

„Maður skilur svekkelsið ef Jói hefur séð þetta svona svakalega vel strax frá byrjun. Eins og við töluðum fyrr í kvöld þá voru viðbrögðin svo rosalega sterk,“ sagði Baldur.

Baldur fletti upp í reglubókinni og þar stendur þar svart á hvítu að þjálfari eigi að fá brottvísun fyrir að yfirgefa boðvanginn viljandi í þeim tilgangi að mótmæla eða kvarta við meðlim dómarateymisins.

Hér fyrir neðan má sjá umræðu Pepsi Max Stúkunnar um rauða spjaldið.