Minnst 84 greindust innanlands í gær

Þetta kemur fram í nýuppfærðum tölum á upplýsingavefnum Covid.is. 29 sjúklingar eru sagðir vera á sjúkrahúsi með Covid-19 en um miðjan dag í gær voru 26 á Landspítala, þar af fjórir á gjörgæslu og tveir í öndunarvél. 

Á mánudag greindist í heildina 141 einstaklingur innanlands en um klukkan ellefu í gær greindu almannavarnir frá því að talan hafi verið minnst 97. 

Einn greindist á landamærum

Einn farþegi greindist með virkt smit á landamærunum í gær. 3.189 innanlandssýni voru tekin síðastliðinn sólarhring sem er svipaður fjöldi og á mánudag. Nýgengi innanlandssmita mælist nú 423 smit á hverja 100 þúsund íbúa og lækkar lítillega milli daga.

Heilbrigðisráðherra tilkynnti í gær að núgildandi innanlandstakmarkanir yrðu framlengdar um tvær vikur. Verður 200 manna samkomubann og eins metra regla því í gildi til og með 27. ágúst auk annarra sóttvarnaaðgerða. 

Fréttin hefur verið uppfærð.