Sjáðu lagleg mörk varamannsins og klaufaleg mistök Elíasar í Hvíta-Rússlandi

Skagamaðurinn Hákon Arnar Haraldsson kom inn á sem varamaður, fyrir fyrirliðann Brynjólf Willumsson, strax á 5. mínútu leiksins og reyndist hetja Íslands því hann skoraði bæði mörk liðsins.

Hákon skoraði fyrra markið á 20. mínútu með frábæru skoti eftir sendingu Kolbeins Þórðarsonar fram völlinn. Seinna markið skoraði hann snemma í seinni hálfleik eftir stórgóða fyrirgjöf Atla Barkarsonar af vinstri kantinum.

Eina mark Hvít-Rússa kom eftir slæm mistök Elíasar Rafns Ólafssonar sem sendi boltann of stutt frá sér, beint á Aleksandr Shestyuk sem vippaði glæsilega yfir Elías og í markið.

Öll helstu atvikin úr leiknum má sjá hér að neðan.

Ísland fékk því þrjú stig með sér heim en liðið mætir Grikklandi á Fylkisvelli á þriðjudaginn.