Seldist upp á tíu sýningar á tólf klukku­tímum

Í tilkynningu frá Borgarleikhúsinu segir að góð sala sýni að mikil eftirvænting sé í loftinu og að Emil eigi eftir að gleðja börn á öllum aldri í vetur.

Frumsýning verði í lok nóvember og Þórunn Arna Kristjánsdóttir leikstýri verkinu. 

Alls séu sautján leikarar í verkinu og Lee Proud sjái um dansana en hann hafi tekið leikhús upp á annan stall með vinnu sinni við verk eins og Mary Poppins, Billy Elliot, Mamma mia og Níu líf.

„Það er aldeilis mikið fjör hjá okkur í miðasölunni, mikið álag og nokkuð um gesti á bið en við hvetjum líka fólk að kaupa miða á netinu. Hvorki símkerfið né heimasíðan eru að hrynja og við munum ná að sinna öllum en tekur allt smá tíma. Svo erum við alveg ferlega spennt að fá alla þessa leikhúsgesti í hús,“ segir Erna Sif Þorkelsdóttir miðasölustjóri.

Síðan Emil kom fyrst fram á sjónarsviðið árið 1963, hefur hann átt vísan stað í hjörtum barna jafnt sem fullorðinna um heim allan og er nafn hans samofið hugmyndum um lífsgleði og prakkaraskap. 

Hér kynnumst við ekki bara Emil og Ídu, litlu systur hans, heldur einnig misþolinmóðum foreldrum þeirra Ölmu og Anton, hinni seinheppnu Línu vinnukonu, sögukonunni Týtuberja Mæju, vafasömu Ráðskunni á fátækrahælinu og síðast en ekki síst stórvini Emils, Alfreð vinnumanni.