Í­huga hóp­mál­sókn á hendur ríkinu vegna á­hrifa bólu­setningar

Nefnd sem var gert að rannsaka tilkynnt tilfelli tíðahringsröskunar skilaði niðurstöðum sínum í síðustu viku. Í þeim kemur fram að ekki sé hægt að útiloka með óhyggjandi hætti tengsl milli bólusetningar og sjö tilkynntra tilvika.

Rebekka Ósk Sváfnisdóttir er í forsvari fyrir fjölmennan Facebook-hóp kvenna sem hafa fundið fyrir röskun í kjölfar bólusetningar. Hún segir að mikil óánægja sé þar með niðurstöðurnar.

Beinist gagnrýni Rebekku einkum að því að nefndin hafi ekki kallað neinar konur inn í líkamlega rannsókn.

„Við sjáum ekki hvernig slík rannsókn geti gefið fullnægjandi niðurstöður. Við erum ekki sáttar með niðurstöðuna og þess vegna höfum við ákveðið að fara lengra með okkur mál,“ segir Rebekka.

Hún átti fund með lögmanni í gær sem hyggst undirbúa næstu skref og kanna grundvöll fyrir mögulegri málsókn. Rebekka kýs að tjá sig ekki nánar um fyrirætlanirnar að svo stöddu.

Óhjákvæmilegt að einhverjar konur upplifi óreglulegar blæðingar

Fram kemur i niðurstöðum áðurnefndar rannsóknar að milliblæðingar og blæðingaóregla sé algengt vandamál hjá konum á frjósemisskeiði. Þegar svo stór hluti sé bólusettur á nær sama tíma sé óhjákvæmilegt að einhverjar þessara kvenna fái óreglu á blæðingar á sama tímabili og bólusetning á sér stað.

Þá er vísað til þess að ekki liggi enn fyrir vísindalegar niðurstöður sem hafi sýnt fram á samhengi milli Covid-19 bólusetningar og óreglulegra blæðinga kvenna.

Jafnframt segir í skýrslu nefndarinnar að nýleg erlend rannsókn gefi vísbendingu um möguleg tengsl milli álags tengdum heimsfaraldri Covid-19 og blæðingaóreglu kvenna.

Rebekka gefur lítið fyrir þessa rök og vill að kafað verði dýpra í þau tilvik sem hafi verið tilkynnt hér á landi.

„Við erum flest allar fullorðnar konur sem þekkjum inn á okkar líkama og það að segja við okkur að hugsanlega sé þetta út af stressi vegna heimsfaraldursins er eiginlega fáránleg niðurstaða.“

Lyfjastofnun hefur borist yfir 800 tilkynningar um einkenni sem vörðuðu raskanir á tíðahring í kjölfar bólusetningar gegn Covid-19. Þá eru tæplega 2.400 meðlimir í Facebook-hópi Rebekku sem ber nafnið Tíðarhringur bólusettra kvenna gegn C19.

Hvetja konur til að leita til læknis

Aðalbjörg Björgvinsdóttir, sérfræðingur í kvensjúkdómalækningum, var hluti af þriggja manna nefnd sem skoðaði tilvikin fyrir Lyfjastofnun og Embætti landlæknis.

Í kjölfar birtingarinnar sagðist hún hafa áhyggjur af því að umræðan um tengsl bólusetningar og blæðingaröskunar leiði til þess að konur fari síður til læknis þar sem þær telji að óvenjulegar blæðingar skýrist af áhrifum bólusetningar.

Ráðleggur nefndin að konur leiti alltaf til læknis ef þær upplifi blæðingaóreglu, miklar blæðingar eða önnur ný einkenni tengd tíðahring sem gangi ekki yfir á nokkrum dögum.