Loksins í smá viðtali: Arnaldur Indriðason kveðst ekki nörd og gefur lítið fyrir hrakspár um íslenskuna

Verðlaun Jónasar Hallgrímssonar eru veitt þeim sem telst hafa unnið íslenskri tungu gagn í ræðu eða riti, með skáldskap, fræðistörfum eða kennslu og stuðlað að eflingu hennar, framgangi eða miðlun til nýrrar kynslóðar. 

Það hlýtur að gilda um Arnald, sem hefur skrifað á þriðja tug bóka, flestar glæpasögur og ófáar vel kunnar drjúgum hluta landsmanna.

Fréttastofa spurði Arnald út í tungumálið, skáldskapinn og Erlend lögreglumann, sem margir eru farnir að sakna, í stuttu spjalli á Þjóðminjasafninu í dag. Arnaldur segist ekki vera íslenskunörd en tungumálið er þó auðvitað hans helsta verkfæri. Réttast auðvitað að beita því af sem mestri vandvirkni.

Við treystum á íslenskuna

Á degi íslenskrar tungu er staða tungumálsins til umræðu og verða þar margir til þess að lýsa yfir áhyggjum. 

Enskan er sögð vera að taka yfir, snjalltækin allsráðandi og yngsta kynslóðin elst upp við gerbreyttar mállegar aðstæður. Þetta eru þættir sem bölsýnustu menn óttast að hljóti að leiða til þess um síðir að tungumálið verði tortímingu að bráð.

Ekki réttur hugsunarháttur, að mati Arnalds: „Það er verið að tala um að íslenskan sé í mikilli hættu og að hún verði jafnvel ekki til eftir 100 ár. En ég held að hún eigi eftir að lifa allt.“

Þú vísar hrakspánum á bug? 

„Já, ég held að við verðum að gera það og við verðum að treysta á íslenskuna,“ segir Arnaldur.

Jónasarmenn og Arnaldskonur

Arnaldur segir mjög góða tilfinningu að fá verðlaun á borð við þessi, sérstaklega þar sem þau séu í nafni Jónasar Hallgrímssonar, sem Arnaldur segir óendanlega stærð í íslenskum bókmenntum.

„Ég held að íslenska þjóðarsálin væri talsvert fátækari án hans og hans verka,“ segir Arnaldur.  

O g þú sem rithöfundur, vildirðu óska þess að þú gætir skrifað eins og maðurinn? 

„Eins og Jónas? Já, það er draumurinn. Ég held að það sé akkúrat það sem maður er alltaf að reyna,“ segir Arnaldur.

Eins og Arnaldur er mikill Jónasarmaður, er Lilja Alfreðsdóttir, mennta- og menningarmálaráðherra, er mikil Arnaldskona. Hún veitti Arnaldi verðlaunin í dag.

„Ég hef lesið allar bækurnar hans, þannig að ég verð að segja að ég er alveg í skýjunum með þetta, líka vegna þess að hann einhvern veginn kemur glæpasögunni á framfæri. Það sem mér finnst svo frábært er að það eru svo margir sem lesa hann og það skiptir svo miklu máli, að við lesum, að við tölum og að við séum að hlusta á íslensku. Þannig lifir hún.“