Þetta eru 100 vinsælustu lög Bylgjunnar árið 2021

Árslistinn er tekin saman með því að skoða alla Bylgjulista ársins sem Bragi Guðmundsson tekur saman í hverri viku. 

Gott tónlistarár á Íslandi

„Tónlistarárið 2021 var mjög fjölbreytt og íslensk útgáfa mikil. Á topp 100 eru 55 íslensk lög og 45 erlend. Á topp 20 eru íslensku lögin fjórtán en þau erlendu sex talsins. Það er því ljóst að Bylgjuhlustendur hafa kunnað vel að meta þau íslensku lög sem komu út á nýliðnu ári,“ segir Sighvatur Jónsson, Hvati á Bylgjunni. Hann fór yfir listann í þætti sínum á Bylgjunni í dag.

„Það er frábært að sjá hvað íslensk tónlist er fyrirferðamikil á árslista Bylgjunnar enda mjög flott íslenskt tónlistarár að baki þrátt fyrir erfiðar aðstæður listamannanna,“ segir Bragi.

Hér má hlusta á þáttinn þar sem farið er yfir listann en hann er birtur í heild sinni neðar í fréttinni.

Bylgjulistinn er samstarfsverkefni Hvata og Braga, sem sjá um þáttinn Helgin á Bylgjunni eftir hádegi á laugardögum og sunnudögum. 

„Bragi tekur Bylgjulistann saman í hverri viku og ég fer sérstaklega yfir hann í helgarþættinum á sunnudögum. Við félagarnir erum tónlistar- og tölvunördar. Okkur finnst mikilvægt að halda utan um alla tölfræði sem gerir okkur kleift að taka saman svona árslista. Vera laganna á Bylgjulistum ársins er grundvöllurinn, við skoðum í hvaða sætum lögin voru, hversu lengi þau voru á listanum og hvort þau náðu toppsætinu eða ekki.“

Dúettarnir áberandi

Það er magnað að vinsælustu lög ársins eru mörg hver dúettar; Jón Jónsson og GDRN, Bubbi og Bríet og ekki síst Ellen og John Grant sem söng á íslensku eitt af bestu lögum sem ég hef heyrt,” segir Bragi.

„Ég hef unnið að vinsældalistum í útvarpi í mörg ár og mér finnst alltaf gaman að sjá hversu mörgum lögum ákveðnir listamenn koma inn á svona árslista, það segir sína sögu um gengi þeirra á árinu,“ segir Hvati.

„Á listanum eru fimm lög með Bubba Morthens og Ed Sheeran. Bríet kom fjórum lögum inn á árslistann og Hreimur og tónlistarkonan Dua Lipa þremur. Þá eru Hafnarfjarðarbræðurnir Friðrik Dór og Jón Jónssynir með tvö lög á listanum hvor og það sama á við um Friðrik Ómar og íslensku hljómsveitina Kaleo,“ segir Hvati.

„Síðan má bæta því við að óvæntasti smellur ársins en jafnframt einn sá ánægjulegasti kom frá Bjartmari Guðlaugssyni, hressandi rokkslagari með beittum boðskap, frábært lag,” segir Bragi og á þar við lagið Á ekki eitt einasta orð.