Þórólfur búinn að skila minnisblaði til Willums

Í minnisblaði Þórólfs frá 5. janúar lagði hann til við heilbrigðisráðherra óbreyttar takmarkanir í þrjár til fjórar vikur í viðbót.

Þann 10. janúar skiluðu svo Alma Möller landlæknir og Þórólfur sameiginlegu minnisblaði þar sem Þórólfur sagði augljóst að þær sóttvarnaráðstafanir sem gripið hefði verið til og nú sværu í gildi, væru í besta falli að halda COVID-19 faraldrinum í línulegum vexti en bæla hann ekki niður eins og ákjósanlegt væri.

Vill koma daglegum smitum í 500

„Stjórnvöld þurfa því að íhuga alvarlega hvort ekki sé tímabært að gripið verði til hertra samfélagslegra aðgerða til að ná betri tökum á faraldrinum samhliða áframhaldandi uppbyggingu heilbrigðiskerfisins,“ sagði Þórólfur í minnisblaðinu 10. janúar.

Að loknum ríkisstjórnarfundi þriðjudaginn 11. janúar tilkynnti Willum Þór heilbrigðisráðherra að takmarkanir yrðu framlengdar um þrjár vikur. Farið hefði verið að öllu eftir tillögum í minnisblaði Þórólfs.

Á upplýsingafundi almannavarna í gær kom fram í máli Þórólfs að hann teldi brýnt að koma daglegum fjölda þeirra sem greinast með Covid-19 niður í um 500, það væri tala sem Landspítalinn gæti ráðið við. Um og yfir þúsund greinast á degi hverjum þessa dagana en þeir voru 1101 í gær.

Bara til að brýna stjórnvöld

Var Þórólfur spurður að því af hverju hann hafi ekki lagt harðari aðgerðir til í minnisblaðinu sem hann skilaði inn í fyrradag með Ölmu landlækni.

„Þetta sameiginlega minnisblað var bara til að brýna í raun og veru stjórnvöld og benda þeim á alvarlega stöðu,“ sagði Þórólfur.

Aðspurður um hvort ekki þyrfti að herða aðgerðir til að koma tölunum niður í 500 sagði Þórólfur að honum sýndist allt stefna í að setja þyrfti harðari takmarkanir á.

„Það er greinilegt og ég held að það sé nokkuð ljóst að ég þurfi ef á eigi að herða aðgerðir þá þarf ég að koma með tillögur um og ég verð fljótur að koma þeim á borðið ef á þarf að halda og mér sýnist stefna allt í það,“ sagði Þórólfur.

Síðar á fundinum var Þórólfur spurður að því hvort að von væri á nýju minnisblaði með tillögum að hertum aðgerðum fyrir helgi var svarið stutt og einfalt.

„Það er jafn vel von á því.“

Það minnisblað er nú komið á borð heilbrigðisráðherra.