Innlent

Segir Mannlíf hafa brotið fjöl­miðla­lög

Viktor Örn Ásgeirsson skrifar
Róbert Wessman
Róbert Wessman

Félag Róberts Wessman fullyrðir að Halldór Kristmannsson hafi greitt fjölmiðlinum Mannlífi háar fjárhæðir í þeim tilgangi að halda úti „níðskrifum“ um Róbert. Hann hefur tilkynnt meint brot til Fjölmiðlanefndar, Skattrannsóknarstjóra og Neytendastofu.

Þetta kemur fram í tilkynningu frá fjárfrestingafélaginu Aztiq sem Róbert Wessman leiðir sem send var á fjölmiðla fyrr í dag.

Í tilkynningunni segir að Róbert hafi fengið staðfestar upplýsingar um að fyrirtækið Skrúðás, sem væri í eigu Halldórs, hafi greitt eiganda Sólartúns „háar fjárhæðir til að halda úti níðskrifum um Róbert,“ eins og segir orðrétt í tilkynningunni. 

Fjölmiðillinn Mannlíf sé í meirihlutaeigu Sólartúns og í tilkynningunni segir að Mannlíf hafi áður verið í eigu Halldórs. Því er einnig haldið fram að fjölmiðillinn hafi skrifað hátt í sjötíu greinar um Róbert og félög honum tengd „í þeim tilgangi einum að rýra trúverðugleika hans sem og þeirra félaga sem hann stýrir, þar á meðal Aztiq.“

Í tilkynningunni segir að Mannlíf hafi misst allan trúverðugleika sem fjölmiðill með því að taka á móti þessum greiðslum. Fjölmiðillinn hafi ítrekað verið vís að því að brjóta siðareglur Blaðamannafélags Íslands og fjölmiðlalög. 

„Að auki hefur háttsemin sett umfjöllun annars fjölmiðils sem Sólartún á í annarlegt ljós. Öll skrif þessara miðla um málefni Róberts Wessman ættu því að detta dauð og ómerk niður,“ segir í tilkynningunni sem er undirrituð af Láru Ómarsdóttur upplýsingafulltrúa Aztiq áður fréttamanns á Ríkisútvarpinu.

Tilkynningin í heild sinni:

Ritstjóri og eigandi Mannlífs vís um brot á fjölmiðlalögum!

Róbert Wessman, sem leiðir fjárfestingafélagið Aztiq, hefur sent Fjölmiðlanefnd bréf þar sem hann fer þess á leit við nefndina að hún skoði sérstaklega greiðslur félagsins Skúðáss til Sólartúns á liðnu ári. Áður hafði Róbert kært umfjöllun Mannlífs, sem er í meirihlutaeigu Sólartúns, til Siðanefndar Blaðamannafélags Íslands.

Þá hefur Róbert tilkynnt ranga skráningu Sólartúns í fyrirtækjaskrá til Skattrannsóknarstjóra en félagið er skráð sem ferðaþjónustufyrirtæki. Jafnframt hefur verið send ábending til Neytendastofu þar sem Mannlíf (Sólartún) kann að hafa gerst brotlegt við lög varðandi kostað efni.

Frá því í janúar árið 2021, eða allt frá því að fyrrum samstarfsfélagi Róberts Wessman, Halldór Kristmannsson, lét af störfum hjá Alvogen, hefur Mannlíf skrifað hátt í 70 greinar um Róbert og félög honum tengd í þeim tilgangi einum að rýra trúverðugleika hans sem og þeirra félaga sem hann stýrir, þar á meðal Aztiq. Þess ber að geta að Mannlíf var áður í eigu Halldórs Kristmannssonar.

Í fyrstu vöknuðu grunsemdir um að Halldór væri að láta Mannlífi í té gögn í þessum tilgangi en í byrjun janúar árs 2022 fékk Róbert staðfestar upplýsingar um að Skrúðás sem er í eigu Halldórs væri að greiða eiganda Sólartúns háar fjárhæðir til að halda úti níðskrifum um Róbert. Hefur þeim verið komið áfram til Fjölmiðlanefndar.

Samkvæmt þessum upplýsingum hefur Sólartún gefið út á liðnu ári reikninga til Skrúðás fyrir textaskrif og aðstoð við textaskrif og nema greiðslur Skrúðáss til Sólartúns tugum milljóna króna í fyrra.

Í samskiptum við ritstjóra Mannlífs undanfarið ár hefur Róbert líkt og samstarfsfólk hans margoft reynt að leiðrétta og koma á framfæri ábendingum til Mannlífs án árangurs. Rangar fréttir hafa ekki verið leiðréttar, ekki hefur verið leitað viðbragða við fréttum og sjaldnast hefur verið haft samband áður en fréttir birtust á vef Mannlífs.

Það er ljóst að Mannlíf hefur misst allan trúverðugleika sem fjölmiðill með því að taka á móti þessum greiðslum. Ítrekað hefur fjölmiðillinn verið vís um að brjóta á siðareglum Blaðamannafélags Íslands og á fjölmiðlalögum. Að auki hefur háttsemin sett umfjöllun annars fjölmiðils sem Sólartún á í annarlegt ljós. Öll skrif þessara miðla um málefni Róberts Wessman ættu því að detta dauð og ómerk niður.

Fyrir hönd Aztiq,

Lára Ómarsdóttir

Fjölmiðlar Reykjavík Deilur Halldórs Kristmannssonar og Róberts Wessman

Tengdar fréttir

Segir fráleitt að hann hafi komið að innbrotinu

Róbert Wessman segir fráleitt að hann hafi með nokkrum hætti komið að innbroti á skrifstofu Mannlífs. Hann segist vonast til þess að lögreglan taki málið föstum tökum og nái sökudólgunum allra fyrst. Árásir á fjölmiðla séu aðför að lýðræðinu og eigi ekki að líðast.

Mest lesið


Fleiri fréttir

Sjá meira


×

Mest lesið