Andrea Rán gengin til liðs við fé­lag í Mexíkó

Hin 26 ára gamla Andrea Rán lék með Houston Dash í NWSL-deildinni í Bandaríkjunum á síðasta ári en fékk ekki áframhaldandi samning þar á bæ. 

Eftir að hafa leikið lengi vel í háskólaboltanum þar í landi vildi hún reyna halda sig við Bandaríkin eða þar í kring og er hún því nú mætt til Mexíkó.

Club América er sem stendur í 5. sæti deildarinnar með 10 stig þegar sex umferðir eru búnar. Alls eru 18 lið í efstu deild í Mexíkó og fara efstu átta liðin í úrslitakeppni að lokinni tvöfaldri umferð.

Andrea Rán er 26 ára gamall miðjumaður sem á að baki 12 A-landsleiki fyrir Íslands hönd og hefur spilað með Breiðabliki hér á landi sem og Le Havre í Frakklandi á ferli sínum.

Þorsteinn Halldórsson, landsliðsþjálfari Íslands, var fyrstur með fréttirnar er hann ræddi við Fótbolti.net í gær en nýtt félag Andreu Ránar tilkynnti komu hennar stuttu síðar.