Vonar að at­vinnu­rek­endur taki flótta­fólkinu opnum örmum

560 Úkraínumenn hafa komið hingað til lands frá upphafi stríðs. Móttaka þeirra hefur gengið vel að sögn Gylfa Þórs Þorsteinssonar, sem fer fyrir verkefninu.

„Síðan erum við að útvega fólki svokölluð skjól þar sem fólk dvelst í kannski 3 til 6 mánuði áður en þau fara í faðm sveitarfélaganna sem þá útvega þeim lengri búsetu,“ segir Gylfi.

Alls konar húsnæði hefur verið tekið í notkun undir flóttamennina, meðal annars nokkrir tugir herbergja á Hótel Sögu.

„Það er svo sem ekki eina hótelið eða gitiheimilið eða húsnæðið sem við erum að taka. Við erum að taka mikið af húsnæði víðsvegar um höfuðborgarsvæðið og Suðurnesin. Við grípum allt sem við getum og er nothæft,“ segir Gylfi Þór. 

Þeir flóttamenn sem gefa sig fram við Útlendingastofnun fara í tímabundið úrræði á vegum hennar, sem er víða á höfuðborgarsvæðinu og Suðurnesjum. Þá er boðið upp á húsnæði sem flóttafólkið getur verið í í þrjá til sex mánuði áður en það fer í faðm sveitarfélaganna. Hann segir sveitarfélög landsins hafa verið mjög viljug til að taka á móti fólkinu. 

„Það eru 26 sveitarfélög sem hafa lýst yfir áhuga á að taka við fólki og við erum í viðræðum við þau. Þetta eru samningaviðræður sem þarf að fara í og við vonumst til að vera búin að klára samninga við sveitarfélögin fyrir páska.“

Börn í minnihluta flóttafólksins

Gylfi segist þá hafa fulla trú á því að atvinnurekendur í landinu taki á móti fólkinu opnum örmum. 

„Við vorum að auglýsa í dag bæði í Fréttablaðinu og Morgunblaðinu, Vinnumálastofnun er að leita að starfstækifærum fyrir þetta fólk,“ segir Gylfi og bætir við: „Þetta er breiður hópur fólks sem hingað er kominn með mikla reynslu úr öllum stigum atvinnulífsins og gott fólk. Ég held að atvinnurekendur verði heppnir með að fá þetta fólk til vinnu,“ segir Gylfi. 

Hann segir koma verulega á óvart að börn séu ekki í meirihluta þessa hóps en þau eru í miklum meirihluta þeirra sem flúið hafa Úkraínu á undanförnum vikum. 

„Börnin eru ekki alveg jafn mörg og við bjuggumst við. Þau sem eru undir átján ára eru um 27 prósent af þessum hópi. Mest eru þetta konur en við búumst við því að þegar á líður og þegar hægist um í Póllandi að fólk sem er þar í miklum þrengslum hugsi sér til hreyfings. Þá er ekki ólíklegt að fleiri börn bætist í hópinn ásamt mæðrum sínum,“ segir Gylfi Þór Þorrsteinsson, aðgerðastjóri teymis sem skipuleggur móttöku flóttamanna hér á landi.